[IRITZIA] Erresistentzia

Mundu mailan erakargarria suerta daitekeen marka baten, turistak erakartzearen eta "bertokoa" saltzearen izenean, nortasuna galtzen hasi garela entzun dut noiz edo noiz. Baliteke. Kanpotik datorren moda edo joera orori ateak ireki gureei leihoak ixten dizkiegun bitartean. "100% Basque Country". Hala ere, gutxi izan arren, erresistentzian mantentzen gara batzuk. Beharbada hori da behar den bakarra: erresistentzia. "Herritik eta herriarentzat" lelo aski ezagunaren pean oinarrituriko borroka armatua. Armatua esan dut, bai. Pintxo-poteetako zuritoa eta pintxoa, kuadrillako txokoko giltzak, gozo-dendaren bateko pastak eta, zorte eta diru nahikoa izanez gero, esku-pilota binakako finalerako sarrerak baitira, besteak beste, gure arma boteretsuenak (eta gozoenak).

Gurea benetan maite badugu horren alde egitea besterik ez da geratzen. Haatik, zaila dela pentsa eta senti daiteke gehienetan. Normala. Nork esan du erraza izango zenik? Gurea dena ezagutu, ulertu, sentitu, maitatu eta identitate propioa eraiki. Erromantikoa, ezta? Modu horretan lor dezakegu aurrerapenaren aitzakiaren eskutik ematen diren aldaketa horien ondorioz inongo identitaterik ez galtzea. Izan ere, ez al duzue uste kuadrillakoekin zurito batzuk edatea, pintxoak jatea, gaueko esku-pilota partidua ikustea eta hurrengo eguneko ajea kafea eta pasta batzuekin baretzea ederra denik? Nik, behintzat, maite dut plan hori.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide