Gaur goizean azaldu du Laudioko alkateak Latiorroko ur-horniketa hobetzeko obren lizitazioa abiatu duela udalak: "Latiorrondo, Goikogane, San Martin, Pagolar, Txindoki, Kamaraka eta Eskutxi kaleetan egingo dira lanak".
Ander Añibarrok aipatu duenez, bertako ur-horniketa sistema oso zaharra da eta kontrolik gabe eraiki da: "batzuetan hodiak bata bestearen gainean jarri ziren". Alkatearen hitzetan, helburua da "ur presio bera egotea auzo osoan eta mozketak ekiditea, besteak beste".
Horretarako, kaleak zulatuko dituzte Latiorrondotik eskailera mekanikoetara. Eragozpenak saihesten saiatuko dira, trafikoa ez eteteko.
40 urteko ur-horniketa sarea ez ezik, Latiorrondon espaloia, ura jasotzeko azpiegiturak eta argiak hobetuko dituzte. Ura jasotzeko sisteman ere esku hartuko dute, Apaloetan.
Asier Goikuria udal teknikariak zehaztu du 1.200 metro kanalizazio berrituko direla eta suhiltzaileentzako 11 sute-aho instalatuko dituztela. Horrez gain, tresna berriak jarriko dituzte ur mozketa isolatuak ahalbidetzeko. Izan ere, egun kale osoak urik gabe geratzen dira matxurak daudenean.
Amiantoa
Azpiegiturak aspaldikoak direnez, udalak fibrozementua -hau da, amiantoa- egotea espero du. Plana prestatu dute materia horiek kentzeko eta edozein arazo ekiditeko.