Sardiniako Babel zinema jaialdian (hizkuntza gutxituetan grabatutako filmak barnebiltzen dituena) sari bat irabazita bukatu da, seguruenik, Esti Urresola laudioarraren Nor, nori, nork film laburraren ibilbidea. Zinemagilearen arabera, jaialdi italiarrak, Aiaraldeko publikoarentzat ez ezik, munduko ikusleentzat ere ikusgarri jarri du Lamuza Ikastetxean grabatutako dokumentala.
Oihartzun horrekin, ikastetxeko egoeraren nondik norakoak zabaltzeko helburua bete duela uste du Urresolak. Ildo beretik, bere filmak euskarak bizirik dirauela irudikatzen duela gaineratu du zinemagileak, “hiltzen saiatu ziren arren”, eta garai modernoetara egokitu dela gehitzen du, “horregatik ikusten dugu hainbat pertsona migratuen ahoetatik hitz eginda”.
Hala ere, Babelen saria jaso zuen emakume bakarra izan zela azpimarratu du film laburraren zuzendariak, “hizkuntza minorizatuetan beste ahots minorizatuagoak” daudela erakutsita. Euskararen etorkizuna, dena den, positiboki ikusten du, eta “emakumeen ahotsa” eta euskara hiztunak gero eta gehiago izatea espero du, “bai kalean, publikoan edo oholtzen gainean sariak jasotzen”.
Nor, nori, nork filmak Cadizeko Alcances dokumental jaialdian hasi zuen bere ibilbidea, eta Lekeitioko Zine Bilern eta Babel jaialdian egon da gero. Gainera, ETBk emisio eskubideak erosi dituela nabarmendu du Urresolak.