Elorritxu Gauez Trailaren lehenengo ekitaldia antolatuko da Laudion datorren martxoaren 3an. 17 kilometroko lasterketa izango da, non partaideek 800 metro desnibelari eta Elorritxu, Jesuri eta Santa Marinako gailurrei aurre egin beharko dieten.
Berezitasun bezala, 18:00tan hasiko da lasterketa, baina gauez bukatuko da, “gauza desberdinak egitearren”, Peli Ortiz antolatzaileetako batek argitu duen arabera.
Beste berezitasun bezala, partaideentzako hornidurarik gabeko lasterketa izango da; hau da, atleta bakoitzak bere janari eta edari propioa eraman beharko ditu proban zehar kontsumitu ahal izateko.
Era berean, arautegian adierazten den arabera, argi frontala, litro erdi ur, sakelakoa, ikusgarri den dortsala eta haize-babesa eramatea izango dira korrika egin ahal izateko nahitaezko baldintzak; ezinbestekoa izango da ere aldez aurretik probaren webgunean izena ematea.
Aurten, lehenengo edizioa izanik, berrehun parte-hartzailek muga jarri du antolakuntzak, baina, “lehenengo aldia izanik, ezinezkoa da berrogeita hamar ala bostehun pertsonek etorri nahiko duten jakitea”, azaldu du Ortizek.
Antolatzaileen arabera, bi arrazoi nagusi egon dira Elorritxu Gauez Trail proba sortzeko. Alde batetik, Mugagabe traila bi urterik behin egiten delako eta, lasterketen egutegian garrantzia mantentzearren, zonaldean beste lasterketa hau egingo da, Mugagaberen frekuentzia berberarekin antolatuko dena.
Bestalde, Laudio mendi lasterketen munduan “erreferente” izanik, “beti ibilbide berdinak egitearen nekea sortu da jendean” eta, gauez lastertzeak, neke horrekin amaitzeko espero dute.
Ez da irabazleentzat eta partaideentzat trofeorik egongo lasterketa amaitzean, baina lasterkari guztientzako afaria antolatuko da proba eta gero. Dena den, hiru ordu izango dira lasterketa epe barruan amaitu ahal izateko muga. Irabaztera doazenentzako, gako nagusia “jaitsiera” izango da, nahiz eta “normalean arina izan” gauez egin beharko baitute, adierazi du ere Ortizek.