Laudioko Udalak 2018. urteko zabor eta estolderia zerbitzuetako eta biltzeko eta ezabatzeko zerbitzuetako tasak kobratuko ditu aurten, zegokien urtean ez baitziren kobratu. Era berean, udaleko Ekonomia eta Zerga Kudeaketako zinegotziak, Eva Marquinezek, “tasa horien 2019ko kontribuzio-errolda” egin ahal izateko lan egingo dutela adierazi du, “egoera anomalo hori erregulatu eta tasak urte naturalean kudeatu ahal izateko”.
Tasak borondatez ordaintzeko bi hilabeteko epea emango dute udaletik, otsailaren 6tik apirilaren 6ra. Helbideratutako ordainagiriak martxoaren 6an kobratuko dira. Era berean, tasen ordainketa helbideratuta ez dutenek Kutxabank, Laboral Kutxa eta Caja Rural de Navarra banketxeen bidez ordaindu ahalko dute.
Borondatezko bilketa-epea amaitzean, ordaindu beharrekoak “premiamendu-prozeduran automatikoki” sartuko direla gehitu dute udaletik, “legez ezarritako errekarguak, berandutze-interesak eta sortzen diren kostuak” gehituta.
Zerga-espedientea udal kudeaketa arloko Ekonomia eta Zerga Kudeaketako Zerbitzuaren bulegoetan aztertu ahalko da, 09:00etatik 14:00etara. Biztanleek “egokitzat eta komenigarritzat” hartutako argibide, alegazio eta erreklamazioak jarri ahalko dituzte. Zergadunek ere berraztertzeko errekurtsoa aurkeztu ahalko dute, betiere hilabeteko epea errespetaturik.