aiaraldea.eus

Gazte migratzaileak euskarara hurbiltzeko egitasmoa abiatuko dute

Erabiltzailearen aurpegia Izar Mendiguren Cosgaya   Euskara  Laudio

Herriko hainbat ikastetxeek sortu dute dinamika Kokoriko Hezkuntza Faktoriarekin elkarlanean, eta Laudioko Udalak diruz lagundu du ekimena.

Gazte migratzaileak euskarara hurbiltzeko egitasmoa abiatuko dute
Hainbat ume xakean jolasten, Lamuza Ikastetxearen urteurren jaian. / Aiaraldea.eus | Ikusi handiago | Argazki originala

Gazte etorri berriak euskarara hurbiltzeko proiektua abiatuko dute Laudion aurten. Herriko ikastetxeek bultzatu dute egitasmoa, Kokoriko Hezkuntza Faktoriarekin elkarlanean, eta udalak diruz lagundu du ekimena.  “Lurraldeko hizkuntza propio eta ofizialean gaitzeko eta integratzeko” egin dute pausoa, Ana Belen Diez Hizkuntza eta Nortasun Normalizaziorako zinegotziaren arabera. “1982an Euskararen Erabilera Normalizatzeko Oinarrizko Legea onartzean oso egoera soziolinguistiko desberdina genuen Laudion, ez baitzeuden azken hamarkadetako migrazio fluxuak. Erronka berriei egin behar diegu aurre”, erantsi du.

Udalerrira iritsi berriengan jarriko dute fokua, eta Lehen Hezkuntzaren bidez euskara ikasteko aukerarik izan ez zutenengan. "Derrigorrezko ikasketak euskaraz egin behar izan dituzte gehienbat, erabat ezezaguna zaien hizkuntza batean, horrek dakarren frustrazio eta ezintasunarekin”.

Egitasmoa Aiaraldea Kooperatiba Elkartearen Kokoriko Hezkuntza Faktoriak bideratuko du, tailer espezifikoen bitartez. “Hezkuntza proiektuaren ildo bat diseinatu da proba moduan ezarriko dena, eta emaitzen arabera datozen ikasturteetan egokitzen eta hobetzen joango dena”, aurreratu du zinegotziak. 20 saio egingo dituzte orotara, ordu eta erdiko iraupenarekin. 15 familiekin abiatuko dute dinamika, Aritz Lili Lekanda Kokorikoko koordinatzaileak azaldu duenez. “Asanblada batean erabakiko dute ikasle potentzial horiekin eta gurasoekin zer egin”, azpimarratu du Laudioko Udalak.

Nola erakarri gazteak?
Hezkuntza ez-formala baliatuko dute Kokorikoko kideek gazteak euskarara hurbiltzeko: “Gazteek erabakiko dute zein ekintza egin modu informalean euskara jasotzeko. Gozotasun eta plazeretik abiatuko da tailerra. Hasiera batean kaleko hizkuntza lantzea izango da helburua, kalean erabili daitekeen euskara”, adierazi du Lili Lekandak. Errezetak, kaletik buelta bat ematea, gazteen intereseko gaien inguruan eztabaidatzea,  mahai-jolasak… Orotariko ekintzak planteatuko dituzte egunerokotasunari euskal hizkuntza gehitzeko, “beraien nahietatik abiatuta”.

Hezkuntza formalean ere esku hartuko dute, “Derrigorrezko Bigarren Hezkuntzako gazteak izanik, beharrezko laguntza eskainiko diegu ere”, argitu du Kokorikoko kideak. Hiztegi bat eratuko dute horretarako, hitz berriak barneratzeko,  ahozkotasunean eta ulerkortasunean zentratuko badira ere. “Ahalik eta modu gozagarrienean hizkuntza lantzea nahi dugu, jolasetik, esperientziatik eta gazteek nahi duten horretatik”. Helburua, beraz, ulermena eta ahozkotasuna jorratzeaizango da, Lili Lekandaren esanetan.

Laudio Ikastola, Laudio BHI eta La Milagrosa ikastetxeak dira proiektuaren parte. “Guk modu informalean landuko dugu, eta eskolek formalean. Eskolek idazmenari helduko diote. Koordinatuta gaudenez, gazte horiek euskarara etortzea espero dugu. Euskara haienganatzea da helburu nagusia, nahiko balute ,gure hizkuntza den heinean, euskaraz bizi ahal izateko aukera edukitzeko”, erantsi du Kokorikoko kideak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa