Ertzaintzak jakinarazi du hiru gizonezkok osatutako gaizkile taldea desegin duela berriki: "talde kriminal antolatu eta hierarkizatu bat osatzen zuten, eta zereginak eta rolak argi banatuta zituzten".
Ustezko kriminalek Bizkaian eta Araban gauzatu dituzte, gutxienez, 3 lapurreta. Horietako bat Laudion izan zen eta besteak Bilbon.
Berez, poliziak ikerketa abiatu zuen Laudion, indarra baliatuta eginiko lapurretaren ondoren. Azkenean, aste honen hasieran Ertzaintzak hiru gizonak harrapatu zituen, Bilboko Euskalduna kaleko etxebizitza batean sartzen ziren bitartean.
4.000 euro konfiskaturik
Atxiloketen ostean, Bizkaiko Ikerketa Kriminaleko Lurralde Atalak Barakaldoko zenbait higiezin arakatu zituen eta "lapurtutako hainbat bitxi, 4.000 euro baino gehiago eta agiri faltsuak" topatu zituen, baita "era guztietako sarrailak irekitzeko erabiltzen zituzten erreminta espezifikoak ere".
Zaballako espetxean
Ostegunean Ertzaintzak epaitegira eraman zituen atxilotuak eta epaileak erabaki zuen Zaballako presondegian sartzea; "etxebizitzatan lapurreta egiten eta agiriak faltsutzen espezializatutako talde kriminal bateko kideak izateagatik".
Bideo etxebizitzetan lapurreta egiten espezializatuta zegoen eta Ertzainak desegin duen talde pic.twitter.com/iIi7rWtNf6
— Ertzaintza (@ertzaintzaEJGV) January 23, 2020
Poliziak uste du taldeak egindako lapurreta gehiago argituko dituela. Bizkaiko Ikerketa Kriminaleko Lurralde Atalak nabarmendu du ustezko hiru gaizkileak Europako ekialdekoak direla eta segurtasun protokoloak eta zaintzaren kontrako neurri zorrotzak hartzen zituztela.
Espetxeratuak Bilbon eta Barakaldon bizi ziren. Hala ere, bakarra zegoen hemen finkatuta. Beste biak, ordea, ibiltariak ziren. Mugikortasun horrek ere zaildu ditu ikerketa lanak, poliziak adierazi duenez.