“Herri aratusteak” antolatzeko lanetan buru-belarri ari dira Sorginlarren elkarte mitologikoko kideak. Hainbat ekintza antolatu nahi dituzte otsailaren 21 eta 22rako. “Ostiralean kalejira mitologikoa egingo dugu arratsaldeko seietan Lamuza parketik abiatuta”, aurreratu dute.
Horretarako, laguntzaile bila ari dira elkarteko kideak: “musikarien eta buruhandi edo momotxorroren bat ateratzeko prest dagoen jendearen bila gaude”.
Gauzak hala, “pertsona orori” luzatu diote parte hartzeko gonbita. Interesdunek mezu bat bidali beharko dute sorginlarren@gmail.com helbidera.
Otsailaren 22an, aldiz, hainbat tailer eskainiko dituzte Herriko plazan. “Hainbat tailer egongo dira”, zehaztu dute. Arratsaldean, aldiz, kalejira egingo dute, inauterietako desfilera bertaratzeko, bertan parte hartuko baitute Sorginlarreneko kideek.
Mitologia elkarteko kideek azaldu dute hiru urte daramatzatela herri aratusteak antolatzeko saiakerak egiten. “Ohiko eskema komertzialetik” aldendu nahi dute horretarako, “antzinako ohiturei” erreparatzeko.