aiaraldea.eus

Marokoko Desert Trophy rallyan parte hartuko du Paul Basabek

Erabiltzailearen aurpegia Julen Solaun Martinez   Kirola  Laudio

Lasterketa, zeinean Seat Panda autoarekin parte-hartzea derrigorrezkoa den, otsailaren hirugarren astean egingo da Marokoko basamortuan. Laugarren partaidetza izango da Basaberentzat mota honetako lasterketa batean, eta aurreneko bosten artean sailkatu nahi duela aitortu du.

Marokoko Desert Trophy rallyan parte hartuko du Paul Basabek
Panda Raid lastertu zuen Basabek duela bi eta hiru urte./ Aiaraldea.eus | Ikusi handiago | Argazki originala

Paul Basabe laudioarrak Marokoko Desert Trophy Panda Edition proban parte hartuko du, Seat Panda ibilgailu klasikoa erabilita basamortua zeharkatzeko helburuarekin.

Proba otsailaren 16tik 23ra bitartean egingo da. 15eko arratsaldean, berriz, Granadan egingo da rallyaren aurkezpena, baina benetako lehiaketa egun bat beranduago hasiko da Nador hiri marokoarrean.

Guztira, sei etapa izango dira, haietako azkena etapa maratoia delarik, zeina bi egun desberdinen artean egingo den, gaua basamortuan pasatuta.

Nahiz eta aurreko urteetan antzeko lasterketak egin izan dituen, aurten, nobedade bezala, berak bakarrik egingo du lasterketa, “aurreneko bosten artean” sailkatzeko helburu nagusiarekin. 

Basaberen aburuz, lasterketaren gakoa ez da abiadura izango, ibilbidean ez galtzea eta penalizaziorik ez jasotzea baizik: “Zenbat eta kilometro gehiago egin ibilbidetik kanpo, orduan eta penalizazio gehiago jasoko duzu”.

Kontuan hartu beharra dago, “Rally Dakarraren antzera”, orientazioak berebiziko garrantzia duela ere mota honetako probetan.

Hau aiaraldearraren laugarren urtea izango da Marokon auto klasikoen rally batean parte hartuko duena. Lehenengo bietan Panda Raid taldean lastertu zen, ibilgailu mota bera erabilita.

Lehenengo partaidetzan “trebetasunik gabe” joan zela aitortzen du Bigarrenean, berriz, esperientzia gehiagorekin eta partaide talde batekin batera joan zen, haien artean laguntzeko asmoarekin.

Iaz, aldiz, probaz aldatu eta Desert Trophyan parte hartzea erabaki zuen, Panda Raida masifikatzen hasia zela ikusita: “Lasterketa hauek gero eta indar gehiago hartzen dute, kontzertuekin gertatzen den bezala; lehenengo edizioetan oso ondo dago, baina gero izena hartzen dute eta jada ez da berdina”.

Era berean, proba hauek “negozio bat” bihurtu direla kritikatzen du ere Basabek.

Dena den, aurtengo lasterketarekin “antzekoa” gertatuko dela susmatzen duela dio, probaren “familia zentzua” galduta. “Jende gehiegi dago, ezinezkoa da familia hain handia izatea; sorosleek ere ezin zu dituzte hainbeste pertsona lagundu”, gehitu du ere.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa