Laudioko Txirrindularitza Elkarteko eskola kategoriako Aiarabike taldeak hamalau txirrindulari izango ditu 2020. denboraldian.
Eskola kirola izanik, Araban soilik egingo dituzte lasterketak, hiru modalitateetako probak tartekatuta: mendiko bizikleta, ginkana eta errepidekoa. Era berean, kategoriako bi lasterketa Laudion antolatzeko asmoa plazaratu dute.
Taldean arituko diren kirolariek, lasterketetatik aparte, bi aldiz entrenatu beharko dute astero kide guztiekin batera. Gauzak hala, Jose Angel Arza elkarteko kideak adierazi duenez, udalarekin ari dira hizketan, mendiko bizikleta eta ziklokrosean entrenatzeko baliagarria den zirkuitu bat sortzeko asmoarekin.
Ginkana, aldiz, Aldai plazan egiteko asmoa dute taldetik. Horrek herrian oinarri txirrindularitza bultzatzen lagundu dezakeela uste du Arzak: “Laudion milaka bizikleta eta zikloturista daude, baina eskola kategorian ez genuen ezer”.
Etorkizunari begira, iraganean izandako eskola, kadete eta gazte mailetako proiektu bilakatzeko nahia ere azaldu du kideak, baina “suabe-suabe eta poliki-poliki” egin beharko dutela eta “zaila” izango dela ere aitortu du.
Dena den, momentu honetan Aiaraldeko txirrindularitzaren egoera iraganean bezain txarra ez dela gehitu du Arzak, dagoeneko eskolako bi txirrindularitza talde baitaude eskualdean, Laudion bata eta Amurrion bestea.
Argazkiak: Laudio Txirrindulari Elkartea