Laudio Institutuko bederatzi ikasle Portugalera joango dira bihar hango beste ikasleekin bizitzera, Erasmus+ programaren barruan.
Otsailaren 8tik eta 15era bitartean, beraz, Lisboatik gertu dagoen Chamusca herri txikian egongo dira ikasleak, Portugaleko, Greziako eta Poloniako beste hainbat ikaslerekin ingelesa praktikatzeko asmoarekin.
Hizkuntzatik aparte, Portugaleko kulturaren inguruan ikastea ere espero dutela aitortzen dute gazteek. Haiek, esaterako, Euskal Herriko hainbat ohituren inguruko aurkezpenak eta proiektuak prestatu dituzte: Euskal Herrian Gabonak nola ospatzen diren azaltzen duen aurkezpen bat, mitologiaren inguruko komiki digital bat eta dantza tradizionalen inguruko bideo bat erakutsiko dituzte, besteak beste.
Berez, Udiarraga Abrisketa irakasleak nabarmendu du ikasleek lan handia egin dutela: tutorialak prestatu dituzte gastronomia eta kulturari buruz, komiki digitala, hiztegia, abestia, Kahoot eta Quizletak sortu dituzte, besteak beste.
Ondoren, martxoan, Laudiora etorriko dira Portugaleko, Greziako eta Poloniako ikasleak, Euskal Herriaren inguruan gehiago ikasteko intentzioarekin, betiere ingelesa hobetzeko.
Momentu honetan, Laudioko Institutuak 29 ikasle ditu programan lanean, hiru irakaslek koordinatuta.