"Lagun talde bat musika jotzen ikusiko du larunbatean Faktoriara gerturatzen denak"

Hainbat lagun musikariz inguratu da Beñat Antxustegi Goikoetxea azken diskoa grabatzeko. / Physis Versus Nomos

BEÑAT ANTXUSTEGI GOIKOETXEA (Barakaldo, 1989) dago Physis Versus Nomos taldearen atzean. Hainbat musikarirekin batu da azken diskoa grabatu eta taularatzeko. Faktorian eskainiko du kontzertua datorren larunbatean, otsailak 15, 20:00etan. 

Duela hamarkada bat hasi zenuen Physis Versus Nomos proiektua. Bakarkako lan moduan hasi zen, baina orain taldea osatu duzue. Zer nolako bilakaera izan du proiektuak? Taldea osatzea aurretik kontzienteki hartutako erabakia izan da edo bilakaera natural bat izan da?

Physis versus Nomos-en proiektuak 10 urte beteko ditu aurten. Lehen hiru diskoak Zartada eta ferekaren artean (2010), Ezin(2013) eta Saudade é fatal 2 (2016) bakarka pentsatuak eta lagunekin grabatuak izan ziren eta kontzertuak bakarrik jotzen nituen.

Hala ere lagunekin jotzeko gogoa banuenez Joska Natke baxujolearekin, Xalba Ramirez bateriajolearekin eta Eneko Sierra saxofoijolearekin kontzertu batzuetarako bandatxoa sortu genuen aspaldi. Eta azken diskoa den Arraro nioenean hau hasieratik taldean sortu eta grabatu dugu. Honetarako Joskaren ordez Unai Pelayo sartu zen, Joska Liherren disko berria prestatzen buru-belarri dabilelako, eta laurok astero entseatu dugu 2019. urtean.

Zer abantaila eta zer desanbantaila ditu taldean aritzeak?

Taldean lagunekin denbora pasatzea da abantaila, elkarrekin musika sortzeaz gozatzea. Desabantailak antolaketari dagozkionak dira, ensaiatzeko denak elkartu ahal izatea, gu eta gure gauza denak sartuko diren ibilgailuak lortzea, kontzertuetako antolatzaileentzat diru gehiago jarri behar izatea... Bakarrik jotzean antolaketa askoz errezagoa da eta gainera ez da "tempoa" hain ondo eraman behar.

Arraro nioenean lana aurkeztera zatozte Faktoriara. Zer topatuko du kontzertura bertaratzen denak? Diskoaren aurkezpen hutsa izango da edo zure ibilbidearen beste kantu batzuk ere entzun ahalko dira?

Diskoko kantuak, Physis-en klasikoak eta bertsio batzuk joko ditugu. Abesti intimistak eta dantzagarriak izango dira. Kontzertura hurbiltzen denak lagun talde bat ikusiko du musika jotzen.

Letrei edo musikari, zer erreparatu beharko lioke entzuleak gehiago larunbateko kontzertuan? Zergatik?

Nik musikari garrantzi gehiago ematen diot baina kantuak jotzen ditugunez letrek ere berebiziko garrantzia dute. Musika honek egunerokotasunaz hausnartzeko aukera eman diezaioke baten bati.

Zeintzuk dira zuen hurrengo geltokiak? Baduzue bestelako proiekturik esku artean?

Otsailean biratxoa dugu, Baionan hasi genuen otsailaren batean, 15ean Laudion, 16ean Larrabetzun izango gara, 22an Atarratzen eta 29an Orbaizetan. Aurrerago emango ditugu data gehiago. Kontzertu gehiago ematea, kamixetak ateratzea, jendearekin gozatzea eta ondo pasatzea da gure asmoa. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide