Larunbatean aurkeztu zuten Sorginlarren elkarteko kideek Herri Aratusteen egitaraua. Ekimenaren hirugarren edizioa izango da aurtengoa eta otsailaren 21 eta 22an garatuko dituzte ekintza guztiak.
Ostiralean kalejira mitologikoa egingo dute Kultur etxetik abiatuta. Larunbaterako, aldiz, egun osoko egitaraua prestatu dute. Tokiko ekoizleen azoka egongo da goizean Herriko plazan. Kirikiño aisialdi taldeak, aldiz, umeentzako jarduerak eskainiko ditu, irratigintza eta sukaldaritza tailerrak tartean. Arratsaldean ohiko desfilean parte hartuko dute Sorginlarreneko kideek. “Bertan parte hartzeko jendea behar dugu”, nabarmendu dute.
Honakoa da aurtengo #LaudiokoHerriAratusteak egitasmoaren egitaraua, ekintza ugari, parte hartzea eta euskal mitologia batzeko asmoarekin, milaka irri eta kolore Laudioko kaleak sorgintzen jarraitzeko!#4urtez4dioSorgintzen pic.twitter.com/QaMabolUle
— Sorginlarren (@sorginlarrenlau) February 10, 2020
Eguna amaitzeko, afaria egingo dute Basalarrina euskal topagunean, 22:00etan, “berrikuntza" gisa. “Tiketak Bazter tabernan daude salgai eta afari goxo-goxoa prestatuko dugu. Horren ostean karaokea egiten saiatuko gara”, aurreratu dute. Horrez gain, “sorpresatxoak” ere prestatzen ari direla jakinarazi dute antolatzaileek.
Parte hartzeko deia
Sorginlarreneko kideek nabarmendu dute laguntza beharko dutela egitaraua aurrera ateratzeko. “Aratuste herrikoi batzuk sortze bidean gabiltza, horregatik nahiko genuke Laudioko herritarren eta, batez ere, gazteen inplikazioa lortzea, dena antolatzeko”. Azaldu dutenez, interesa duen orok mezu bat bidali dezake sorginlarren@gmail.com helbide elektronikora.
#LaudiokoHerriAratusteak egitasmoaren baitan, herri afaria antolatu dugu otsailaren 22an, Basalarrina elkartean, 22:00etan, tiketak Bazter tabernan daude salgai, 5 eurotan, anima zaitezte!#4urtez4dioSorgintzen pic.twitter.com/hXmDvf2ghV
— Sorginlarren (@sorginlarrenlau) February 10, 2020