Latiorroko Ikastetxearen parean dauden baratzak kentzea eskatu die udalak ortu horiek erabiltzen dituzten bizilagunei. Martxoaren 15era arte eman die hori egiteko epea.
“Martxoko hurrengo astean ikuskapen-bisita egingo da. Agindutakoa bete ez dutenek espazioa utzi beharko dute nahitaez, eta udalak egingo du garbiketa, subsidiarioki”, azaldu du tokiko erakundeak ortuen sarreretan jarritako bandoan.
Hala ere, udalak jakinarazi du egun batzuk gehiago emango dizkiela bizilagunei “etxolak bezalako tresna eta elementuak” kentzeko eta, modu horretan, jada landatu diren produktuak babestu eta ez hondatzeko, betiere auzokideek “gune horien okupazioarekin amaitzeko konpromisoa” hartzen badute.
Udalak azaldu du legez kanpoko okupazioa dela Latiorrokoa, “arautu gabekoa”. Tokiko erakundeak azaldu duenez, 2014. urtean eskatu zitzaien bizilagunei tresna guztiak kentzeko, “baina ez zuten halakorik egin”.
Bizilagunetako batzuek, aldiz, Aiaraldea hedabideari adierazi diote ortuek 50 urte inguru daramatela bertan, eta ez diotela inori kalterik egiten.
Lekualdatzeko aukera
Udal gobernuak nabarmendu du aukera emango diela erabiltzaileei Isasin dauden baratze publikoetara lekualdatzeko. “Horretarako, nahi duten herritarrek izena eman beharko dute udaletxean, modu ofizialean eskatzeko”.