aiaraldea.eus

“Azken argiak” diskoa plazaratu du Ziztada&Rlantz taldeak

Erabiltzailearen aurpegia Txabi Alvarado Bañares   Kultura  Laudio

“Gazte, emakume eta herri honen parte izateagatik pairatzen diren zapalkuntzak” jorratzen dituzte diskoko bederatzi abestiek.

“Azken argiak” diskoa plazaratu du Ziztada&Rlantz taldeak
Ziztada abeslari bilbotarrak eta Rlantz ekoizle amurrioarrak osatzen dute taldea. / Taupaka | Ikusi handiago | Argazki originala

“Azken argiak” izenburua jarri diote Ziztada abeslari bilbotarrak eta Rlantz ekoizle amurrioarrak euren bigarren diskoari. Bederatzi abestiz osatutako lana da. Lehen zazpi kantak euskaraz dira eta azken biak, aldiz, ingelesez.

Musikariek azaldu dutenez, letra guztiek hari komun bat dute oinarri: “gazte, emakume eta herri honen parte izateagatik pairatzen diren zapalkuntzak” jorratzen dituzte. “Azken Argiak diskoak duen oinarria errepresioa eta zapalkuntza izango litzateke, baina azken argi bat ikusten da, izenak esaten duen bezala, kobazulo ilunetik irteteko ahalmena dagoela azpimarratzen da”.

Taupakarekin argitaratu dute diskoa. Elkarte horren webgunean entzun eta deskargatu daitezke abesti guztiak.

Kontzertuak
Emanaldi ugari eskainiko ditu taldeak datozen asteetan. Ostiral honetan -martxoak 6- Bergarako Gaztetxean egongo dira. Hilaren 13an Deustuko Gazte Lokalean arituko dira, eta hurrengo egunean Maulera joango dira, Zinka Bizirik elkartean jotzeko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa