Autonomien arteko futbol txapelketaren bigarren fasea jokatuko dute Ellakuriko zelaian Euskadik, Gaztela Mantxak eta Melillak, ostiraletik igandera.
14 eta 16 urtez azpikoentzako torneoa izango da eta kategoria bakoitzeko irabazlea bakarrik sailkatuko da finalerako. Kontuan hartu beharra dago asteburu honetako emaitzak abenduan jokatutako partiden emaitzetara gehituko direla talde garailea erabakitzeko.
Torneoaren lehenengo fasea abenduan jokatu zuen Euskal selekzioak Logroñon, Galiziako eta Errioxako selekzioen kontra.
16 urtez azpikoek bi norgehiagokak irabazi zituzten; beraz, asteburu honetakoak irabazita automatikoki igaroko dira finalera. 14 urtez azpikoek, ordea, bakarra irabazi zuten eta, nahiz eta Gaztela Mantxa eta Melilla garaitu, ez dute finala ziurtatuta.
Laudioko alkateak, Ander Añibarrok, ohoretzat hartu du partida horiek antolatzeko parada, eta “futbol onaz gozatzeko aukera” dela adierazi du gaur goizean egindako prentsaurrekoan.
Euskal selekzioaren inguruan ere optimista agertu da alkatea eta Euskadik titulu hau irabaztea merezi duela esan du.
Euskadiko Futbol Federazioko presidenteak, Luis Maria Elustondok, bestalde, partiden lehiakortasuna azpimarratu du eta gehitu du Gaztela Mantxa izango dela arerio arriskutsuena.
14 urtez azpikoen partidak 10:30ean hasiko dira eta 16 urtez azpikoen norgehiagokak 12:30ean. Ostiralean Gaztela Mantxa eta Euskadi lehiatuko dira, larunbatean Melilla eta Gaztela Mantxa, eta igandean Euskadi eta Melilla.