Bere laugarren filma laburraren edizioan lanean ari da Esti Urresola zinemagile laudioarra. Koronabirusaren aurkako neurriak abiatu baino aste batzuk lehenago amaitu zituzten grabaketak.
Zinemagileak azaldu duenez, alarma egoerak zaildu egingo du filmaren muntaiaren fase osoa, baina egin ahalko dutelakoan dago.
Polvo somos da pelikularen izena, eta familia baten “erretratu laburra” plazaratuko du, Urresolak aurreratu duenez. “Aitonaren heriotza gertatzen den asteburuan girotuta dago. Lau emakumek osatzen dute sendia: amonak, amak eta bi alabek. Asteburu horretan tenkatu egingo da bi ahizpen arteko harremana”.
Ilargi Molinilloren estreinako lana
Hainbat aktore ezagun agertzen dira pelikulan: Itziar Aizpuru, Jone Laspiur, Goize Blanco, Klara Badiola, Patxi Santamaria eta Txema Blasco.
Baina agerraldirik deigarriena Ilargi Molinillorena da, bost urteko neska laudioarra. “Gasteizen egin genuen haurra bilatzeko castinga. Hainbat neska aurkeztu ziren, baina azkenean Laudioko familia batek deitu gintuen eta Ilargi aurkeztu zidaten”, oroitu du Urresolak.
Beste asteburu batean egin zioten proba, Laudioko Kultura etxean, eta azkenean bera hautatu zuten familiako ilobaren papera antzezteko.
Filma luzea, geldirik
Urresolak badu beste proiektu bat esku artean: 20.000 especies de abejas pelikula, bere lehenengo filma luzea izango dena. Haur transexual baten istorioa izango du hizpide Urresolaren lanak.
Madrilgo La Incubadora garapen programarako hautatu zuten proiektua, beste filma luze batzuekin batera. Hala ere, koronabirusa dela eta, prozesua etenda dago momentuz.