Alarma egoera ezarri zenetik, Covid-19, koronabirusaren hedapena geldiarazteko helburuarekin neurri ugari hartu ditu Laudioko Udalak, eta beste asko erakunde publikoek erabaki dituzte.
Juan Jesus Merchan gazteria zinegotziak azaldu duenez, "ezohiko egoera honen aurrean, lonjen funtzionamendua kaltetutako guneetako bat da. Horretarako, udalerriko gazteek planteatu dituzten zalantza ugariri erantzuteko, gida erraz bat egin da -udalaren webgunean eta sare sozial instituzionaletan kontsultatu ahal izango da-, eta espero dugu azken asteotan galdetzen ari diren egoera asko argitzea".
Gehien planteatzen den gaietako bat da ea alarma egoeran zehar lonja erabil daitekeen edo ez pertsona berdinak barruan badaude. Erantzuna argia da, ezin da. "Gaur egun espazio horien erabilera mugatuta dago eta, egoera ikusita, oso garrantzitsua da administrazioak hartzen dituen neurriak zorrotz betetzea", eman du jakitera zinegotziak.
Bestalde, Udaltzaingoak edo Ertzaintzak zigor ekonomikorik jar al dizkiete gazteei lonjan aurkitzen baditu? "Erantzuna baiezkoa da. Orain agindua argia da, etxean geratu behar da. Arrazoi justifikaturik gabe kalera irten ezin dugun bezala, ezin dugu lonja erabili ", gaineratu du Merchanek.
Alokairua ordainketa
Lonjaren alokairuari dagokionez, hainbat zalantza izan dira: "Hilabete honetan ez gara lonjan egon eta ez dakigu noiz sartu ahal izango garen berriro, alokairua ordaindu behar dugu?".
Alarma-egoerarako ezarritako neurrien artean, gaur egun ez da aztertzen alokairuen gaia. Beraz, kontratuak adierazten duenez, hilero ordaintzen jarraitu behar da. Hala ere, eta salbuespenezko egoera dela ulertuta, hainbat aukera daude.
Merchanek gomendatu duenez, "alde batetik, konfinamendua amaitutakoan lonja erabili nahi izanez gero, eta salbuespenezko kasua dela ulertuta, jabearekin akordioak lortzen saiatu gaitezke alokairua negoziatzeko. Bestalde, lonjarekin jarraitu nahi ez bada, kontratuaren klausulak bete behar dira, jabeari adostutako egun batzuk lehenago jakinarazteko".
"Edozein zalantza izanez gero, gazteak Lonjakidetza zerbitzuarekin harremanetan jar daitezke gaztelonjak@laudio.eus posta elektronikoaren edo 689 241 594 telefonoaren bidez", ondorioztatu du gazteria zinegotziak.