Aurten ere horretan ari ginen, COVID-19 delako gaitz madarikatu batek gure jarduna oztopatu duen arte. Batzordeko kideok, aurtengo San Joan Astobitzako jaien ospatzea, azken asteotan buruan izan dugun galdera izan da eta ditugun aukerak baloratu ostean (kontzertuen ospakizuna, taloak eskatzeko sortzen diren hilera amaigabeak, Krosa), 2020. honetan, jaiak bertan behera uztea erabaki dugu.
Ez dugu ezagutzen ekainean izango dugun egoera, baina azken unean urteroko egitaraua antolatzea ezinezkoa zaigu jai batzorde txikia eta xumea garen heinean. Erabaki honekin atea zabalik utzi nahi dugu data hurbiltzen doala, bestelako ospakizun bat burutzeko aukerari, izango dugun egoerak eskainiko dizkigun aukerak baliatuz.
San Joan Astobitzako jai batzordetik uneoro saiatu gara herri dinamika eta komunitatea hauspotzen eta bide honetan, egoera hau kontutan hartuz, gure aportazioa egin nahiko genioke Laudioko herriari. Gauzak honela, urtero jaiak aurrera eramateko jasotzen dugun dirulaguntza, COVID-19ak herritarrongan sortu dituen zailtasunei aurre egiteko bideratzea gustatuko litzaiguke; izan aurpegi maskara gehiago lortzeko edota osasun zerbitzuek test fidagarri gehiago eskura ditzaten.
Besterik gabe, espero dugu egoera ahalik eta lasterren bueltatzea bere onera eta datorren urtean berriz ere suaren inguruan dantzan elkartzea.
Herriak bakarrik salba dezakeelako herria, elkar zain dezagun.
Gora jai herrikoiak!