Krisialdi ekonomikoak herritarrengan izango dituen ondorioak leuntzeko neurri ekonomikoak “berehalakoan” ezartzea eskatu dio Omniak Laudioko udal gobernuari ohar baten bidez. Era berean, taldetik proposatutako hainbat neurri ekonomiko atzera bota izana kritikatu dute, eta EAJk eta PSE-EEk osatutako gobernuari leporatu diote jadanik martxan zeuden neurri batzuk “berriak balira bezala” saltzea (komertzio, pertsona autonomo, enpresa eta PYMEentzako aholkularitza pertsonalizatua, adibidez), nahiz eta beste berri batzuk ere sortu dituzten (ostalariei hilero kobratzen zaien terraza eta mahaitxoaren tasa, esaterako).
Nahiz eta haien “proposamen batzuk” aurrera atera direla aitortu, “dirua ordaintzearekin zerikusia zutenak” arrakasta izan ez dutela gehitu dute. Horien artean honako hauek nabarmendu dituzte: “Obren lizentziak automatikoki egitea momentuz, eta egoera lasaitzean erregularizatzea, Ondasun Higiezinen Zergarekin hobari lerro bat sortzea, komertzio txikia eta ostalaritzara bideratua; eta bi laguntza fondoen sorrera (PYME eta autonomoentzako bata eta egoera prekarioan dauden familientzako bestea, biak ala biak 300.000 eurokoak).
Horren harira, Laudioko Udalak duen gaineratiko diru kopurua 1,7 milioi eurokoa izango dela gehitu dute, “pertsonetan inbertitzeko behar adina diru”. Gainera, tokiko erakundeak gaur egun eskaintzen ez diren zerbitzuetako kontratuak bertan behera utzi diela azpimarratu du alderdi laudiorrak, Aretako liburutegia edo ludoteka, esaterako.
Dena den, Zuzen programa (nerabe gatazkatsuak dituzten familiak laguntzeko iniziatiba) bertan behera uzteak “atentzioa deitu” ziela adierazi dute oharrean, eta gehitu dute alkatetzatik azaldu zitzaiela eskakizunen bat egotekotan berriz aktibatuko zela. Hala ere, Omniaren aburuz,“familia askok ez dakite zerbitzu hau existitzen dela” eta, horregatik, gehiago zabaltzea eskatu dute.