Laudioko EH Bilduk hainbat neurri aplikatzea proposatu dio udal gobernuari, deseskaladari begira. Udaletik “kanpaina propioa” abiatzea planteatu du oposizioko taldeak, “ mezu positiboak erabiliz eta arduraz jokatzeko deia eginez”.
Udan garatzeko “umeentzako jarduerak eta aisialdi-programazio berezi bat” gauzatzea ere eskatu du talde politikoak.
Halaber, “Tokiko turismoa sustatzea” proposatu dute EH Bilduko kideek, “ herriko natura eta kultura ondarearen aberastasuna balioan jarriz, eta euskal herritarrei ezagutzera emanez”. Tokiko kontsumoa sustatzea, garbiketa zerbitzua indartzea eta horretarako protokoloa “ondo definitzea” ere iradoki dute. Bukatzeko, haur eta gazteen eguneko zentroa berriz martxan jartzeko aukerak aztertzea eskatu diote udal gobernuari, “kolektibo zaurgarriarekin harremana izateaz gain”.
EH Bilduko kideek salatu dutenez, oposizioko taldeei ematen zaien informazioa geroz eta murritzagoa dela. Gauzak hala, bozeramaile batzordea deitzeko beharra azaleratu dute, udal gobernuarekin “hau guztia landu eta modu partekatuan egiteko”.