Zenbait proposamen helarazi dizkio Omniak udalari, “hainbat behar detektatu ostean”. Alde batetik, kirol azpiegiturak irekitzea planteatu du alderdi laudioarrak, kiroldegia kasu. Estalitako igerilekuak irekitzea proposatu du oposizioko taldeak, Ellakuriko gunean “aisialdirako” uzteko.
Ildo beretik, kirol ez-federatuak abiatzea eskatu dute taldeko kideek, herritar guztiek kirol-azpiegiturak erabiltzeko aukera izan dezaten, “federatuta egon edo ez”.
Bestetik, udan umeentzako jarduerak egiteko erraztasunak ematea eskatu dute, “familia kontziliazioa eta adingabeen garapen soziala” sustatzeko.
Hala ere, horrelako ekintzak antolatzeko udalak protokoloak zehaztu eta beharrezko azpiegiturak utzi beharko dituela nabarmendu dute, jarduerak “erabateko segurtasunarekin” gauzatu ahal izateko.
Bukatzeko, kultura eskaintza sustatzea proposatu dute. “Udal gobernuak bilera bat egin du elkarteekin eta esan die ekintza kopurua eta horietara bideratutako dirua murriztuko dutela, arrazoi ekonomikoak argudiatuta”.
Gauzak hala, “irizpidea aldatzea” eskatu du Omniak, udako agenda kulturala sortzea proposatuta.