IA URTEBETE GREBA MUGAGABEAN

Novaltia Bizkaiako langileek elkarretaratzeak egingo dituzte ostegunean Laudion

Ia urtebete daramate langileek greba mugagabean.

Ia urtebete daramate beharginek greba mugagabean. Prentsaurrekoa eskainiko dute ostegunean, 12:00etan. 

Bi elkarretaratze egingo dituzte Novaltia Bizkaiako langileek ostegun honetan -ekainak 25- Laudion. Carlos Fuertes farmazian (Ardantzazar 9, Laudio) izango da lehena, 11:00etan. Bigarrena ordubete geroago izango da, Egia Solaun farmazian (Zumalakarregi 13, Laudio). Prentsaurrekoa eskainiko dute bertan, Aiaraldea Komunikabideak jakin duenez.

Ia urtebete greba mugagabean

Botika banaketa enpresa bat da Novaltia, eta bertako langileek 2019ko uztailaren 22tik daramate greba mugagabean, hainbat arrazoi medio. Langileen ordezkariek nabarmendu dute urte eta erdi eman zutela enpresaren lan hitzarmen berria negoziatzen, eta azkenean ez zutela adostasuna lortu. Gainera, 2019ko otsailean enpresak hitzarmena kendu eta akordio sektoriala aplikatu zien, eta urte bereko abuztuan Zaramatamoko biltegia Zamudiora mugitzeari ekin zion  zuzendaritzak, beharginekin ezer adostu gabe. 

Soldata eskala bikoitz “bidegabea”

Horrez gain, “soldata eskala bidegabea” aplikatzen ari dira, grebalarien esanetan. “Kontratatutako langile berriek kategoria eta funtzio berdinak dituzten gainontzeko langileak baino %35 gutxiago jasotzen dute ordainsarietan, eta gehiegizko baldintzak ezartzen zaizkie; jai-egun eta igandetan lan egitera derrigortuak egoteraino, enpresak beharrezkotzat ikusten badu”.

Gainera, enpresak ez dio uko egin biltegiko funtzio nagusiak kanporatzeari, eta Enpresa Batzordeko kideak jazarri ditu, grebalarien arabera. Salatu dutenez, epaiketa bat egon zen arrazoi horregatik, eta horren ostean zuzendaritzak espedienteak ezarri zituen. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide