Julen Reketa mendizale laudioarra izango da Urmuga ibilaldiko gidarietako bat. Euskal Herriko mendiak mendebaldetik ekialdera musikarekin zeharkatuko ditu egitasmoak. Euskal Herriko gailur esanguratsuenetako batzuetatik igaroko da ekimen ibiltaria, Angulotik Hiru Erregeen Mahaira bidean.
Guztira, hemeretzi etapa egingo dituzte partaideek –uztailaren 14tik abuztuaren 1era, hain zuzen ere- eta kontzertu batzuk eskainiko dituzte mendietan barrena, baita etapak amaitzen diren herrietan ere, entzule kopuru handiagoarekin. Lehenengo bi etapak Aiaraldetik igaroko dira, Angulo eta Altube lotuko baitituzte, Urduñako mendatea barne.
Reketak gidari lana egingo du ia hiru asteetan zehar, Felipe Iriarte mendizalearekin batera. Iriarte da, hain zuzen ere, antolatzaileetako bat, Et Incarnatus orkestrako ordezkaria den Miguel Zeberiorekin batera. Gidari lanaz egiteaz gain, musika jotzeko toki esanguratsuenak bilatzen lagundu du laudioarrak.
Izena eman nahi duten pertsonek oraindik aukera dute horretarako, www.urmuga.eus webgunean. Bost ibilbide antolatu dira, hainbat iraupenetakoak: asteburu batetik hemeretzi egunetara bitartekoak. Ezinbestekoa da hamalau urtetik gorakoa izatea parte hartu ahal izateko. Webgunean bertan kontsultatu daiteke informazio guztia.
Hona hemen aurkezpen bideoa: