Loli Muriel zinegotziak Laudioko Udalak azken hilabeteetan egindako urratsak azaldu ditu gaur goizeko prentsaurrekoan. "LGTBI+ kolektiboa eta sexu askatasun eskubideak aldarrikatzeko eguna da ekainaren 28a. Politika zehatzak ditu Laudioko Udalak LGTBI+ kolektiboa babesteko", adierazi du gobernu ordezkariak. Horren adibidetzat jarri du 2018. urtean abiatutako protokoloa, aisialdi edo jaiei lotutako espazioetara egokitutakoa.
Horrez gain, tokiko erakundearen laugarren Berdintasun Plana prestatzen ari dira, aurreratu duenez: "Gaur egun sexuen araberako rol eta esteroetipoak deuseztatzeko ahaleginak egiten ari gara, eskoletan trans generoaren lanketa egiten ari dira".
Udaletxeko balkoian sexu aniztasuna aldarrikatzeko pankarta eta bandera jarri dituzte, eta gauez fatxada ortzadar kolorez argiztatuko dute
Udaletxea koloreztatuta
Ekainaren 28an sexu aniztasuna aldarrikatzeko koloretako bandera eta pankarta eskegi dute udaletxeko balkoian. Gainera, herriko plazako eraikina ortzadar kolorez argiztatuko dute. "Herriko LGTBI+ taldeekin harremaentan gaude, nerabeen egoera in situ ezagutzeko", erantsi du zinegotziak. Ildo beretik," elkarteek herri feminista, justu eta librea izateko gauzatzen duten lana" eskertu du Murielek.
Udal barnean aldaketak
Udal barnean ere egin dituzte aldaketak, udaletxeko tramitazioetan sexu aukerak areagotuta: "Genero guztiak aintzat hartzeko emakume zein gizonezkoen gain 3. atal bat jarriko dugu". "Sentipenak askatu" lemapean garatuko dute aurtengo kanpaina, Yogurinha Borova artista laudioarraren ekimenarekin bat eginez. Bestalde, ohi bezala, Zinegoak programan parte hartuko du udalak: "100 ikus-entzunezko baino gehiago zabalduko dira. Bideoak ikusteko sarbidea www.laudio.eus webgunean eskatu behar da".