Salatu dutenez, unibertsitatera sartzeko proba horren gaineko erabakiak "aldebakartasunez" hartu dira. "Hartutako erabakiek argi uzten dute, Euskal Autonomia Erkidegoko zein Nafarroako gobernuek ez dutela hezkuntza komunitatearekin zubiak eraikitzeko inolako intentziorik", azaldu dute mobilizazioan, eta nabarmendu dute "oso larria" iruditzen zaiela ikasleen egoera kontuan hartu gabe etengabe erabakiak hartu izana. "Sekulako presioa eragiten digu unibertsitatera sartzeko probak, inoiz baino baldintza kaxkarragotan egin beharko dugu aurten, inoiz baino presio handiagoarekin”.
Gauzak hala, hainbat aldarrikapen jarri dituzte mahai gainean. Alde batetik, selektibitatea ikasle bakoitzak gertuen duen espazioan egitea eta mugitu behar direnei garraio zerbitzua eskaintzea eskatu dute, "segurtasun neurri guztiak bermatuta". Edukiei dagokionez, hirugarren ebaluazioan landutakoa azterketan ez sartzea exijitu dute, eta baita azterketa ereduen arteko ariketen aukeraketa malgua izatea ere. Azken aldarri bat ere plazaratu dute: probak zuzentzeko baliatuko diren irizpideak denboraz helaraztea.