Ugarteko jaiak ofizialki bertan behera geratu diren arren, auzoko jai batzordeko kideek ez diote lan egiteari utzi. Urrian hasi ziren aurtengo festen nondik norakoak zehazten. Martxoan bilera bat egin nahi zuten dena bideratzeko.
Hainbat ideia zituzten mahai gainean. “Herri kirolen desafio bat antolatzeko asmoa zegoen, eta mendi lasterketa bat sortzeko ideia ere planteatu zen”, azaldu dute, “baina koronabirusaren krisiaren ondorioz bertan behera utzi behar izan genuen dena”. Orain, jaien ordez egiteko eguneko ekintza sorta bat adosten daude udalarekin, osasun neurriak betetzeko baliabideak eta aukerak dauden aztertuaz.
Iazko Ugarteko jaiak bereziak izan ziren, belaunaldi aldaketa eman zelako jai batzordean. “Ugarteko hainbat gazte batu ginen. Jai herrikoiak antolatzeko premia ikusten genuen. Auzolan elkarteko kideekin bildu ginen, ordura arteko jaien analisia egiteko. Eurekin harremana mantentzen jarraitzen dugu, jai parte-hartzaileagoak lortzeari begira”. Azaldu dutenez, Ugarten txikituz joan da jai herrikoien presentzia, “ekintza puntual batzuetan baino ez da egon, larunbateko bazkarian kasu”. Gauzak hala, bi helburu nagusi zehaztu zituzten batzorde berriko kideek: jaiak auzora gehiago bideratzea eta adin guztietarako egitaraua sortzea, gazteentzako deigarriagoa izango zena.
Baina hori lortzera bidean traba handi bat izan zuten: denbora. “Ez genuen debora askorik izan eta nahiko estu ibili ginen”. Ez zituzten nahi zituzten aldaketa guztiak egiterik izan. “Aurreko programa hartu eta gauza batzuk aldatu baino ezin izan genituen egin”. Jaien aurreko asteak “zoramena” izan ziren, baina positiboki baloratu dute esperientzia. “Jendea oso pozik aritu zen, eta bizilagun ugarik esan ziguten aspaldi ez zela Ugartera horrenbeste jende gerturatzen”.
Aldaketa horretan sakontzen jarraitzeko asmoa dute jai batzordeko kideek, eta auzoko gazte orori luzatu diote antolakuntzan aritzeko gonbita.