Aiarako Kuadrillak azken hilabeteetan izandako funtzionamendua kritikatu dute Omniak, Okondo Aurrerak eta Aiara Batuzek prentsa ohar baten bidez. Oposizioaren “funtsezko eskubideak” urratu direla uste dute hiru taldeek,ez direlako ohiko batzordeak ez eta ohiko udalbatza egin azken hilabeteetan.
“Erabaki hori aldebakartasunez hartu zuen Kuadrillako Presidenteak, ezer komunikatu edo jakinarazi gabe, Omnia, Aiara Batuz eta Okondo Aurrera taldeei behintzat”. Nabarmendu dutenez, konfinamenduak iraun duen hilabeteetan “pare bat mezu elektroniko” baino ez dituzte jaso Kuadrillaren partetik.
Gauzak hala, idazki bat plazaratu dute oposizioko hiru taldeek, lau berraztertzeko helegiterekin. Honakoa eskatzen dute idazkian: maiatzean egiteko zen udalbatza eta ogasun zein ingurugiro batzordeak “ahalik eta lasterren” egitea.
Azaldu dutenez, azaroan egin zen azken udalbatza, urtean bi baino ez direlako egiten. “Hartutako erabakien gaineko kontrola eta fiskalizazioa egiteko balio duten foro bakarra da”, nabarmendu dute eta Kuadrillak jarritako “aitzakiak” balio ez duela argudiatu dute: “bilerak modu ez-presentzialean egiteko baliabide telematikoak falta direla esan dute. Azken hilabeteetan frogatu da posible dela bilera horiek telematikoki egitea, Euskadiko udal guztietan jarri direlako jardunarekin jarraitzeko baliabideak”.