Abereh arduratuko da ostiral honetako -uztailak 24- Faktoria Arrastia girotzeaz. 20:00etan izango da zita Laudioko Abasto plazan.
Erik Berganza ezkutatzen da Abereh ezizenaren atzean. 2016. urtean abiatu zuen proiektua Balmasedako abeslariak, Estricalla eta beste talde batzuetan aritu ostean. Handik gutxira plazaratu zuen lehen diskoa, Zaunka datoz arin izenekoa. Baina Laino eta belatz artean lana aurkeztera gerturatuko da Laudiora, hori baita bere ekoizpen berria.
Ohikoan bezala, afaltzeko aukera eskainiko du Aiaraldea Ekintzen Faktoriako Ekonomatuak kontzertuak iraun bitartean, eta taberna zerbitzua ere egongo da. Borondatea eskatuko da sarrera gisa, "krisi egoera honetan kultur-sortzaileak babestu eta sustatzeko".
Aiaraldea hedabideak, bere aldetik, zuzenean emitituko du kontzertua, Aiaraldea.eus atarian.
Hurrengo kontzertuak
Irailera arte luzatuko da Faktoria Arrastiak ekimena. Abuztuaren 1ean Jon Gurrutxaga & Urbil Artola igoko dira Abasto plazako oholtzara, 8an Asla taldea, 14an Ane eta Ainhize bikote akustiko ugaoarra, 22an Ekiza, 28an Esne Potak eta Peru Galbete 29an.
Irailaren 5ean izango da azken emanaldia, Birkiten eskutik. Arratsaldeko zortzietan izango dira kontzertu guztiak. Koronabirusa ekiditeko derrigorrezkoa izango da musukoa janztea.