Osasun larrialdiak iraun zuen bitartean Laudioko Udalak eta sindikatuek negoziazioa abiatu zuten lan hitzarmen berria sinatzeko, 2020-2023 urteen artekoa, alegia. Ekainaren hasieran LAB erakundeak iragarri zuen ez zuela sinatuko zenbait desadostasun zirela medio.
Izan ere, nahiz eta, LABen aburuz, hobekuntzak dauden lan hitzarmen berrian, marra gorri batzuk zeharkatu dira. Horien artean, bat prozedurari dagokio. LABek eskatu zuen akordioa sinatu baino lehen langile batzarra deitzea guztien artean erabakitzeko, orain arte egin den bezala.
Hala ere, gairik korapilatsuena soldata eskala bikoitzari buruzkoa da. Berez, LABek argudiatzen du iraungi berri den hitzarmenean zeuden langile guztiek kobratuko dutela gehigarria soldatan, baina etorkizuneko langileek ez dutela jasoko. Hortaz, sindikatuaren ustez, soldata eskala bikoitza ezartzen da.
EAJren azalpena
Egungo udal gobernu taldeak aitortu du horrela izango dela, baina aurreko gobernuari leporatzen dio horren ardura. Ander Larrinaga alkateordeak hala azaldu zuen prentsaurreko batean: "EH Bilduk Espainiar Gobernuak ezarritako mugen gainetik igo zien soldata 2015-2019 urteetn arteko hitzarmenean udal langileei eta, ondorioz, hori legez kontrakoa da. Carlos Urquijo Gobernuko ordezkaria zenean helegitea jarri zuen, adibidez. Beharginek gaitasun ekonomikoa galdu ez dezaten, gehigarri pertsonala negoziatu dugu. Hala ere, gehigarri hori aurreko lan hitzarmenaren barruan zeudenek izango dute bakarrik".
ELAk, bere aldetik, Aiaraldea Hedabideari jakinarazi zion langileen sekzioak batzarrean erabaki zuela adierazpenik ez egitea udal hitzarmenari buruz.
Marra gorriak eta hobekuntzak
Edonola ere, LAB sindikatuak oztopo gehiago aipatu ditu hitzarmena sinatzeko. Esaterako, aparteko orduen ordainketaren kontra agertu da, horrek enplegua sortzen ez duelako. Horrez gain, sindikatuak erantsi du 2020an %2an igoko zaiela soldata, baina hurrengo urteetan gobernu zentralak agintzen duena beteko dela. Hortaz, murrizketak egoteko atea zabalik dago, %1eko igoera finko egin ordez, LABek egiten zuen moduan.
Hala eta guztiz ere, sindikatuk onartu du hobekuntza batzuk ere adostu dituztela ELAk eta udal gobernu taldeak. Aldez aurretik erretiratzen direnek 5 eguneko baimena izango dute, larrialdiak 00:00etatik aurrera dituztenek hurrengo txandan libratzeko aukera izango dute eta, senide bat hilko balitz, egun bat izango lukete libre langileek, besteak beste.
Oposizioak
Udal hitzarmenean desadostasunak izan badituzte ere, LABek adierazi du oposizioen oinarrien negoziazioan elkarrekin joateko lan egingo dutela sindikatuek.