Enrique Gastaka Barbara, "Enriquín" lagunen eta auzokideen artean, abuztuaren 8an zendu zen. Oro har, jende gehienak ezagutu zuen Landaluzen autoak desegiteko tokia zuelako, baina herrian zein auzoan bestelako ekarpenak egiten zituen, gehiegi zabaldu gabe.
Zentzu horretan, Emiliano Diez auzokideak bi esparrutan nabarmendu du Enriquínen izaera. Arlo pertsonalean, Diezek azpimarratu du oso lagun hurbila zela: "beti prest entzuteko eta laguntzeko, gehiegi pentsatu gabe. Gainera, beti hartzen zintuen irribarre batekin aurpegian. Oso maitagarria zen".
Horrez gain, aztarna polita utzi zuen Landaluzen: "Auzokide ona zen, laguntzeko prest. Eskuzabaltasunez eta hurbiltasunez, beharren bat egonez gero, bere esku bazegoen laguntzea, egiten zuen. Kamioia edo langileak bidaltzen zituen San Joan Jaietan laguntzera".
Baserria eta euskara
Horrez gain, Emiliano Diezek gogoratu du herriko nortasuna oso gogoko zuela Gastaka Barbarak: "Baserria maite zuen. Nahiz eta horri esker ez bizi, ardiak zituen, eta zaintzen zituen. Maitasun hori herrian islatu zuen, San Blas Jaia antolatzen laguntzen baitzuen. Bigarren lerroan jartzen bazen ere, bere azpiegitura erabiltzen zen".
Herri izaerari dagokionez, euskararen defendatzailea zen, Diezek azaldu duenez: "Ez zekien euskaraz, baina egin ahal zituen urratsak egin zituen. Adibidez, bere enpresan kartelak euskaraz zeuden".
Umore ona
Iñaki eta Floren Otaolak ere ondo baino hobeto ezagutu zuten, eta Emiliano Diezek bezala, bere nortasun umoretsua eta irribarretsua goraipatu dute: "bibrazio onak transmititzen zituen. Kalitate handiko pertsona zen".
Gainera, bere konpromiso politikoa aipatu dute: "Euskal Herria askatzeko aldarrikapen politikoekin egiten zuen bat, bereziki, euskal preso politikoen eskubideekin".
Bere ideien artean, eta baserriari zein ardien pasioari lotuta, Otaola anaiek uste dute aipatu behar dela ingurumenaren zaintzaile sutsua zela, "nahiz eta autoak desegiteko tokia izan, sentsibilitate ekologiko handia zuen eta kontsumismoaren aurkaria zen. Oso kritikoa zen horrekin".
Bere heriotzarekin, Landaluze auzoetako zutabe bat desagertu da, baita bere etengabeko irribarrea ere.