"Araba Euskaraz 2021 jaiaren hastapen ekimena" deitu dute abuztuaren 29rako; hots, larunbat honetarako. Oharrean azpimarratu dutenez, Laudio Ikastolak hartuko du 2021 urtean Araba Euskaraz jaia antolatzeko arduraren lekukoa: "Laudion 2011n ospatutako jaialdian bezala, jaiaren abiapuntua herriko jaiekin lotzeko ekimena prestatu du Laudio Ikastolak, oraingoan, bizi dugun pandemiak eragindako osasun larrialdira erabat egokituta, jakina".
"Odoloste eguna" hautatu dute lehen harria jartzeko, ospakizunik izango ez bada ere, "kanpainaren abiapuntua irudikatuko duten kamisetak egun horretan janzteko deia" luzatu dute, "kamisetek Araba Euskaraz 2021erako aukeratutako leloa -Zabal bideak- eta logoa uztartuko dituzte".
Ospakizunik ez
Alabaina, ez da ospakizunik sustatuko, "ekimenak ez du jairako gonbitarik luzatuko". Laudio Ikastolak adierazi duenez, hitzorduaren helburua izango da 2021 urtean Araba Euskaraz kanpaina eta jaia Laudion kokatuko direla iragartzea, bizi dugun osasun larrialdira egokituta, baina euskara, kultura euskalduna eta ekimen herritarren sostengua osasun larrialdian ere uztartzerik badagoela aldarrikatuz".
Kamiseten salmenta
Oraingoz, leloa eta kamisetak aurkeztu dituzte sare sozialetan. Abuztuaren 27an eta 28an jarriko dituzte salgai 10 euroren truke Aldai plazako baserritarren azoketan, 10:00etatik 13:30era ostegunean zein ostiralean; eta larunbatean Basalarrina euskal topagunean, "10:00etatik 13:30era eta 16:00etatik 19:00etara".