Unax Lekanda atleta laudioarrak 3. postua erdietsi du Euskadiko Atletismo Txapelketan, kategoria absolutuan, 100 metroko diziplinan. 11.24 segundoko markak balio izan dio horretarako, nahiz eta bere emaitza pertsonal onena 11.16 segundokoa izan.
Hala ere, goiza ez da modurik onenean hasi kirolariarentzat. "Finalerdietan 4. postuan sailkatu naiz. Euria ari zuen eta ez dut nahi bezain ondo egin. Zorionez, finalean hobeto egin dut. Uste nuen 4. sailkatzea posible zela gutxienez, arerioen markak ikusita. Dena den, inoiz ez dakizu, gorputza ez baitago beti berdin".
Lekanda pozik dago. Izan ere, aurtengo denboraldia bere ibilbideko onena izan da: "60 metroko lasterketan Arabako txapeldunordea izan naiz eta orain Euskadiko 3. sailkatu naiz".
Hurrengo denboraldia
Gaurko lorpenarekin atletak bukatutzat eman du denboraldia. Hori bai, ez du atseden handirik hartuko: "Iraileko 2. edo 3. astean berriro ekingo diot entrenatzeari. Nire helburuak izango dira marka pertsonala hobetzea 11 segundora murriztuta, berriro podiuma zapaltzea Euskadiko Txapelketan eta Espainiako Txapelketan parte hartzeko sailkapena eskuratzea".
Unax Lekanda duela 6 urte hasi zen atletismoan, futbola utzi ostean, orkatilan lesio ugari izan ondoren. Laudio Atletismo Taldean sartu zen lagun baten bitartez, eta ohorezko mailan lehiatzeko, Atlético Pamplona klubera batu zen, aurten, hain zuzen: "Gasteizen proposatu zidaten eurekin lehiatzea. Klub garrantzitsua da eta Estatu Espainiarreko elitean dago, txapelketa gorenean parte hartzen du".