"Profil faltsua sortu da sare sozialetan Ander Añibarro alkatea barregarri uzteko, eta beraz, errespeturik ez izateko, tokiko erregidorea umiliatzea bilatzen duten argitalpenekin".
Aiarako jeltzaleek prentsa ohar bidez salatu dute sare sozialetako "fakea".
"Desadostasun politikoa, kritika eraikitzailea eta lehia beti ondo hartzen dira demokrazian, baina errespetutik egiten denean. Horregatik, pertsona baten nortasuna ordezkatzea onartezina da, eta gaitzespen posible guztia merezi du", azpimarratu dute oharrean.
Erantsi dutenez, politikan ez du denak balio: "Beste pertsona baten izenarekin sare sozialetan profil faltsu bat sortzea, kasu honetan Ander Añibarro Laudioko alkatearena, berari iseka egin eta umiliatzeko asmoz, oso gustu txarreko keinua da. Gainera, deigarria da Laudioko Udaleko oposizioko talde nagusiak, EH-BILDUk, Añibarro alkatearen "fake" profila Twitterren duen kontuan jarraitzea".
EAJk horrelako ekintzak eta jarrerak gaitzetsi ditu, eta udalean ordezkaritza duten alderdi guztiei dei egin diete herriaren hobekuntzan eta garapenean modu eraikitzailean lan egiteko, "izan ere, bada gobernatzeko beste modu bat, egiteko beste modu bat, eta izen ona kentzeko, umiliatzeko eta kalumniatzeko kanpaina zikinak alde batera utzita".