Omnia alderdiak prentsa oharra atera du abuztuko jaien datetako udal ekintzak kritikatzeko. "EAJ-PSE gobernu taldeari belarri tirakada egin nahiko genioke KultUda programagatik. Ekintza horiek sanrokeetako egun zehatzetako jarduera sorta ezkutatzen zuten", adierazi dute oharrean, "abuztuaren 16an sanroke eguna zen, 28an baserritarrena eta 29 odolosteena".
Omniaren aburuz, parte hartze politikoa ez da existitu agenda planifikatzean, "erabaki guztiak gobernu taldeak hartu ditu, oposizioari ideiak eta iritziak emateko aukera kenduta".
Ildo beretik, jai kuadrilen parte hartzea eta eragileena oso murritza izan dela erantsi dute. "Udala beharrezko neurriak hartuta gai ikusi bada ekintzak egiteko, beste kanpo eragileek ere jarduerak antolatzeko aukera izan beharko lukete, ezarritako protokoloa beteta".
Koronabirusak eragindako pandemiaren bilakaeragatik, Omniak hartutako jarrera argudiatu du: "Kutsatzeek gora eginda, Omniatik ekintzak bertan behera uzteko beste udalerriek hartutako bidea jarraitu behar zela uste genuen; horregatik erabaki genuen udalak antolatutako ekintzetan ez parte hartzea".
Pregoilari izendapenaz, berriz, asmo on baina garapen txarreko ekintza izana arbuiatu dute: "Herritarrek hilabete hauetan egindako lana eskertzeko ideia ona zen, baina biztanleei protagonismoa eman ordez eurek idatzi dute testua, baita pregoi ekitaldi pribatua antolatu ere, laudioarrak bazter utzita".
Omniaren iritziz, ekitaldiak ez zuen zertan jendetsua izan, baina pregoiko mezua herritarren ahotan entzuteko baliabideak topa zitezkeen, bakoitzaren mezua bideoz grabatuta kasu: "Non ikusi da pregoilariek parte hartzen ez duten pregoi irakurketa? Ez du inolako zentzurik".
Azkenik, kultura bizirik mantentzearen garrantzia azpimarratu dute, udal gobernuaren kudeaketa kritikatuta: "Ez dira ari euren benetako aurpegia erakusten, eta Omniatik argi dugu: botereak ez ditu pertsonak aldatzen, benetan direna erakutsi baizik".