Laudioko EH Bilduk agerraldia egin du gaur salatzeko udal gobernu taldeak zerga eta tasak garestitu nahi dituela. Koalizioak Arantzar aparkalekuan egin du prentsaurrekoa, azpiegitura erabiltzen duten garraiolariei zerbitzuaren prezioa bikoiztu nahi dietelako. "Egun 60 euro inguru ordaintzen dira aparkalekua baliatzeagatik eta 2021ean 120 izatea nahi du udal gobernu taldeak. Horrek esan nahi du 900 euro gehiago ordainduko dituztela", salatu dute Santi Hernando eta Jose Mari Gutierrez zinegotziek.
EH Bilduk azaldu du EAJk eta PSE-EEk ibilgailuen zerga %10ean igo nahi dutela, zabor-tasa %5ean eta ura %2an, besteak beste
EH Bilduko ordezkariek igoeren adibide gehiago jarri dituzte: "Hilerrian nitxo bat izateagatik 98 euro ordaintzetik, 155 pagatzera igaroko da herritarra, EAJk eta PSE-EEk egin duten proposamenaren arabera. Hau da, %60 gehiago. Ibilgailuen zerga %10 igotzea proposatzen dute; zabor-tasa %5; estolderia eta ura %2".
Koalizioaren ustez, "Bereziki adierazgarriak dira merkataritzari eta ostalaritzari eragiten diotenak: terrazetan %10eko igoera eta Abasto Merkatuko postuetan %10ekoa".
Hobarien proposamena
EH Bilduk kritikatu du igoera horiek inolako diskriminazio positiborik gabe egingo direla. Horregatik, Jose Mari Gutierrezek defendatu du bestelako fiskalitate neurriak hartu ahalko liratekeela: "Herritar guztiei eragiten dieten zergak izoztea, hala nola ibilgailuen gaineko zerga, ondasun higiezinen gaineko zerga (OHZ)... Hobarien aukerak hobetzea eta zabaltzea, OHZn edota zabor eta uraren tasetan 42.000€ bitarteko (egun, OHZren kasuan, 21.000€ bitartekoentzat da) errenta duten familientzat %95eko hobarien bidez, esaterako. Ostalaritza urte osorako terraza-tasatik salbuestea. Exentzio-proposamen hau, EH Bildutik pandemiari aurre egiteko aurkeztutako neurri-sortan planteatu genuen. Era berean, eskaini ezin izan diren zerbitzuei dagozkien tasa edo prezio publikoak itzultzeko formula (zati proportzionala) aztertzeko eskatuko dugu berriro”.
Kudeaketa eredua
Udala enpresa baten moduan kudeatzea egotzi die koalizioak EAJ eta PSE-EEri, eta zenbait zerbitzu defizitarioak izatea aldarrikatu du. "Udalaren egoera ekonomikoa ona zen lehen eta ona da orain. COVID-19aren ondorioz inbertsioak ere eten dira", adierazi du Santi Hernandok.
Zentzu horretan, koalizioak uste du “gobernu-taldearen arduradun ekonomikoek erantzukizun politikoa kanpoko aholkularitza-enpresa baten esku utzi dutela; kontu publikoen ikuspegi merkantilista islatu dutela proiektuan, eta berriz ere erakutsi dutela sentsibilitaterik ez dutela krisi honetan okerren pasatzen ari direnekin”.
Gardentasun falta
Azkenik, Santi Hernandok erantsi du EAJk eta PSE-EEk edozein erabaki txiki zarata askorekin komunikatzen dutela udal hedabideen bitartez, baina kasu honetan ez dutela ezer esan.
Gauzak horrela, ostegunean egingo den ez-ohiko batzordean eskatuko dute udal tasen eta zergen planteamendua guztiz aldatzea.