Entrenatzeari ekin diote Ganbegi hockey taldeko kideek. Abuztuaren 25ean hasi ziren Gazte mailako taldekoak. Irailean, aldiz, Lehen mailakoak batu dira entrenamenduetara, COVID-19aren aurkako segurtasun neurriak jarraituz betiere.
“Banakako teknikak eta lan fisikoa egiten ditugu, ez gara taldekako dinamikak egiten ari”, azaldu du Hector Borgek, “6 metroko distantzia bermatzen saiatzen gara entrenatzen gaudenean, eta bestela ere bi metroko distantzia mantentzeko ahalegina egiten dugu, maskarak jarrita”.
Multzoka antolatu dute Gardeako zelaia. “Sei jokalari aritzen dira laurden bakoitzean”, azaldu du Ganbegiko kideak, “hasi zein amaitzean tenperatura hartzen dugu, eta bakoitzak bere material propioa erabiltzen du”.
Denboraldiari begira
Denboraldi berriko erronka nagusia denboraldia “hasi eta amaitzea” dela nabarmendu du Borgek. “Egoera honetan ez dakigu hasiko garen edo ez ezta noiz amaituko den ere”.
Hala ere, badituzte bestelako erronkak ere. Gazte kategoriakoak Espainiako belar hockey txapelketan sartzen saiatuko dira. Lehengo mailakoekin, aldiz, helburu xumeagoak izango dituzte: “Lehen mailan mantentzea eta ahalik eta hoberen egotea”. Hala ere, helburu hori “zaila” izango da, Borgeren ustez, taldearen erdia txandaka lan egiten dagoelako, eta horregatik ezin dutelako nahi beste entrenatu”.
Areto hockeyari dagokionez, ez dakite lehiatuko diren edo ez. “Azken urteetan ez dira talde asko egon Euskal Herrian, eta zaila da Espainiako Txapelketan sartzea aurretik ia jokatu gabe egonda”.