Omniak prentsa oharra plazaratu du jakinarazteko zeintzuk diren bere ekarpenak 2021ko tasa eta zergen araudiari dagokionez. Talde independenteak hamaika neurri azpimarratu ditu. Esaterako, ibilgailuen gaineko zerga mantentzea proposatu du, baita hobariak egotea auto elektrikoa erostean, nahiz eta bigarren eskukoa izan.
Hobarien bidearen alde egin du ere Omniak; eraikinen, lanen eta instalazioen esparruan. Zehazki, taldeak uste du %95eko hobaria egokia dela obren helburua berriztatze energetikoa denean. Halaber, iradoki dute tasa doitu behar dela lanen prezio errealera, aurrekontuak aldatzen baitira.
Ildo beretik, Kultura Etxearen tasako hobaria erretiratuei zabaldu behar zaiela argudiatu du Omniak, eta ostalarien mahaien %50eko hobariaren alde egin du, osasun egoera dela eta. Zentzu berean, osteguneko azoken tasak mantendu behar dira, taldearen aburuz.
Tasen eta zergen igoera
Bi kasutan aldarrikatu du Omniak egon behar direla egoerak zerga eta tasetan; etxebizitza hutsetan eta sakelako telefonoen enpresetan, orain ez baitute ordaintzen.
Edonola ere, udal gobernu taldeak aurreikusitako bi zerbitzuen garestitzearen kontrako jarrera duela argitu du Omniak. Alde batetik, hilerriko tasa handitzeko ez dago arrazoirik, plataformaren hitzetan, “eta bereziki, pentsiodunek hartuko dute euren gain igoera”. Hori dela medio, dauden moduan geratzea defendatu dute.
Bestalde, Arantzar aparkalekuan planteatutako igoera zentzugabetzat jo dute. Horren ordez, bestelako kudeaketa eredua erabili behar dela aldarrikatu dute.
Zerbitzu errentagarriak
Azkenik, zerbitzuen errentagarritasunari buruz hausnartu du Omniak. Taldeak ez du ulertzen bat-bateko beharra zenbait zerbitzu errentagarriak izateko, eta aipatu du beste asko ez direla: ura edo zabor bilketena, adibidez.
Zentzu horretan, euren apustua ez da igoera lineala gauzatzea, baizik eta ingurumenarenean eta jasangarritasunean oinarritutako tasa eta zerga sistema, “gehien kontsumitzen eta kutsatzen duenak, gehiago ordaindu dezan”.