Latiorroko Ikastetxeko jantokiko erabiltzaile gehienak zerbitzurik gabe utzi ditu Eusko Jaurlaritzak, Guraso Elkarteak salatu duenez

Aitor Aspuru Saez 2020ko ira. 28a, 18:11

Latiorroko Ikastetxearen sarrera, ikasturteko lehen egunean eginiko argazki batean. / Aiaraldea.eus

Latiorroko Guraso Elkarteak jakinarazi du Eusko Jaurlaritzak ez duela bideratu begirale nahikorik jantokira eta, ondorioz, zerbitzurik gabe geratu direla ume gehienak. Bihar hasiko dituzte mobilizazioak.

Latiorro Ikastetxeko jantokiaren erabiltzaile gehienak zerbitzurik gabe geratu dira gaurdanik. Izan ere, garraiatuak edo bekadunak direnei eta norbanako esleipena dutenei soilik eskaintzen die Eusko Jaurlaritzak aukera hori.

Guraso Elkarteak adierazi du haur gehienek ez dutela ikastetxean bazkaltzeko paradarik izango. Elkarteko presidenteak horrela azaldu du: "Eskaintzarik gabe geratu dira erabiltzaileen erdia baino gehiago".

Jantokiko langile batek berretsi du egoera: "Oro har, 300 ikasle baino gehiagok bazkaltzen dute jantokian, gaurtik aurrera eta egoera konpondu arte, 150ek edo 160ek baino ez dute zerbitzua jasoko".

Begirale falta

Arazoaren muina begiraleen gabezian datza. Antza, Latiorro Ikastetxeak begirale gehiago kontratatzea eskatu zion Hezkuntza Sailari, "talde burbuilak" errespetatzen direla bermatzeko.

Ostiralean gurasoek jakin izan zuten Eusko Jaurlaritzak uko egin diola eskaera horri eta, hori dela medio, ezinezkoa bilakatu da izena eman duten ume guztiek jantokia erabiltzea. Langile batek gaineratu duenez, iaz 19 begirale zeuden ikastetxean eta aurten gutxiago dira.

Mobilizazioak

Gurasoek jadanik ekin diote protestak antolatzeari eta bihar Latiorro Ikastetxean batuko dira 13:00etan eta ogitartekoa jango dute kalean, gertatutakoa modu sinbolikoan salatzeko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide