Laudioko Udalak Landaluzeko ur saneamendua berritu nahi du eta jadanik esleipena abiatu du. Lehen faseko esku hartzea izango da kaleko hasieran, Zumalakarregi etorbidetik lehen bihurgunera, hain zuzen. 170 metrotan zabalduko dira obrak eta helburu nagusia da porlanezko tutuak kentzea eta PVCko beste batzuk jartzea, hormigoizko putzuak ere ezarrita. Horrekin ekidingo dute eurien urak ur beltzekin nahastea.
Kasu honetan 190.000 euro bideratzea aurreikusi du udalak eta fase guztiek 796.039 euroko balioa izango lukete. Hala ere, Ander Añibarro alkateak aurreratu du, momentuz, zati horretan eragingo dela bakarrik.
Basaurbeko araztegira begira
Azpiegitura zaharrak aldatu ez ezik, helburua da dena prest uztea Basaurbeko araztegia bukatuta dagoenean putzu septikoak ixteko, Patxi Abaroa udal teknikariak azaldu duenez: "Behin Basaurbeko araztegia lanean egonda, putzu septikoak ez dira beharrezkoak izango eta sarera joango dira urak".
Edonola ere, udalerriko puntu gehiagotan eragin beharko du Laudioko Udalak araztegia amaitu baino lehen: Landaluze osoan, Aretako eraikin arrosan eta zubian eta Jose Arruen ere, isurketa puntuak baitaude.
2021ean hasiko dira obrak
Arkitekto teknikoaren kalkuluen arabera, litekeena da lanak datorren urtean abiatzea: "Jadanik abiatu dugu esleipenaren idazketa eta abenduko erdialdean espero dugu jakitea nork egingo dituen lanak. Dena ondo bidean, 2021ean hasiko dira obrak".
Eragina auzokideengan
Ur saneamendu sarea lekuz aldatzea ekarriko dute obrek. Orain espaloiaren azpian dago, baina aurrerantzean herrigunera doan errepideko erraian kokatuko da. Patxi Abaroak argitu du trafikoan eragina murrizten saiatuko direla: "Ez dugu tarte osoa irekiko, baizik eta putzuka. Trafikoa bideratzea errazagoa izango da horrela".