Prentsaurrekoa eskaini dute gaur Ander Añibarro alkateak eta Felix Mugurutza kultura-ondare udal teknikariak iragartzeko Ermualderi buruzko jardunaldiak prestatu dituztela. Santutegian bertan egingo dira eta puntako hizlariak gonbidatu dituztela ziurtatu dute.
18:30ean izango dira solasaldiak santutegian bertan eta urriaren 31an egingo da lehena, Alberto Santana Ezkerraren eskutik. "Baskoniako historia bat" ekoizpenaren egileak sagardoa izango du hizpide "Ermualde sagardogile. Sagardo makina handiak euskal etxe, baserri eta dorretxeetan, duela 500 urte" izeneko hitzaldian.
Azaroaren 7an, aldiz, Jesús Muñiz Petralanda irudi erlijiosoen adituak hartuko du hitza. Santutegian dagoen XVI. mendeko birjinaren irudian zentratuko dira bere azalpenak. Berez, dauden bi birjinei buruz aritu behar zen, baina lan horrek txunditu du eta interpretazio zabala eskainiko du "Santa Maria del Yermo: Euskal Herriko gotiko berantiarreko maisulana" izenburupean.
Azaroaren 14an Iñaki García Camino Bizkaiko Arkeologia Museoko zuzendariaren txanda helduko da. "Historiaren lanbroetan: eliza bat lur belarrean" solasaldiaren bidez jorratuko du Euskal Herriko sorrera Erdi Aroan.
Hitzaldiak santutegian bertan egingo dira, informazio zabalpena ez ezik, emozioa ere sortu nahi baitute antolatzaileek.
Azkenik, azaroaren 21ean Sergio Escribano Ruiz EHU irakasleak hitz egingo du. Escribanok zuzendu ditu 2019ra arte Ermualdeko indusketak eta lan horien emaitzak azalduko ditu. "MMXX Anno Domini, zaharrak berri. La arqueología del Santuario de Santa María del Yermo" mintzaldian argituko ditu han topatutako aztarnak.
Edukiera mugatua
Jardunaldietan parte hartu nahi dutenek derrigorrez deitu beharko dute 651 703 133 telefono zenbakira edo mezua bidali euskara@laudio.eus helbidera. Urriaren 19a izango da lehen eguna horretarako. Felix Mugurutzak azaldu du oso zorrotzak izango direla eta nabarmendu du inskripzioa bete eta gero agertzen ez denari ez diotela utziko berriro joaten. "Pandemiaren ondorioz edukiera 40 lagunera murriztu behar izan dugu eta benetan interesatuta daudenei emango diegu lehentasuna".
Horrez gain, Mugurutzak azaldu du ekimenaren helburua ez dela soilik informazioa zabaltzea: "Emozioak ere sortu nahi ditugu eta horretarako santutegian bertan egingo ditugu hitzaldiak. Esperientzia sortzeko, adibidez, ez dugu berogailurik jarriko barruan".