Hainbat komunikabidek jakinarazi dute Andoni Aldekoa laudioarrak zuzenduko duela Euskal Irrati Telebista hasi berri den legealdian. Gauzak horrela, Aldekoak alde batera utziko du Euskalduna Jauregiko zuzendaritza eta hedabide publikoaren ardura egokituko zaio.
Berez, badirudi EAJ eta PSE-EE ados jarri direla eta erabakia Eusko Jaurlaritzako Gobernu Kontseilura eramango dutela asteartean. Horren ostean, Eusko Legebiltzarrak berretsiko du izendapena. Izan ere, jeltzaleek eta sozialistek gehiengo absolutua dute erakunde horretan.
Andoni Aldekoak ibilbide profesional eta politikoa bete du jadanik. Kazetaritza ikasi eta gero, Cadena Ser eta Canal Bizkaia komunikabidetan lan egin zuen. Gero Bilboko Udalean hainbat kargu izan zituen eta Iñaki Azkunaren eskutik ardura handiak izan zituen tokiko erakundean. Besteak beste, alkatetzako zuzendaria izan zen.
Horren ostean, Eusko Jaurlaritzan hautatu zuten Lehendakaritzako aholkulari eta azken 3 urteak Euskalduna Jauregia zuzentzen eman ditu.
Aiaraldea hedabidean hainbat iritzi zutabe idatzi ditu laudioarrak. Hemen irakurri daitezke guztiak.