Donostiko zinemalditik Laudioalde aretora egingo du salto Akelarre pelikulak. Larunbat honetan egongo da filma ikusteko aukera, 17:00etan eta 20:00etan.
Pablo Agüero zinemagile argentinarrak zuzendu du lana. XVII. mendean girotua dago eta sorginkeria leporatuta atxilotu eta epaitutako emakume batzuen istorioa kontatzen du. Euskal Herriko hainbat txokotan grabatu zuten filma iaz, euskarazko eta gaztelerazko elkarrizketak tartekatuta.
Amurrio Antzokian ez da filmik proiektatuko asteburuan, Araba Euskaraz dinamikari amaiera emateko kontzertu maratoia egongo baita igandean. Hala ere, gaur -urriak 16- Dance is my heroine dantza ikuskizunaz gozatzeko aukera egongo da.
Orozkon, hilabete amaieran
Orozkoko Donibane Aretoan, aldiz, hilabete amaieran ekingo diote zinema eskaintzari. Saio bikoitzak eskainiko dituzte, larunbat eta igandeetan, ohiko ordutegiarekin. Sarrerak egunean bertan eskuratu ahalko dira soilik, edukiera murriztua izango delako COVID-19aren aurkako segurtasun neurriak direla eta. Sarreren prezioa 3,5 eurokoa izango da adingabeentzat eta 4,5 eurokoa helduentzat.