Elkarretaratzea egingo dute Laudion larunbatean, azaroak 28, “Okupazioa sortu, babestu eta defendatu” lemapean. 12:30ean izango da zita Alberto Acero plazan. Antolatzaileek nabarmendu dute segurtasun neurriak errespetatuko direla ekimenean, “maskara eraman zein distantzia mantentzea”.
Honakoa ez da Laudion okupazioaren alde egiten de lehen ekimena. Orbeko Etxeak hainbat kartel jarri zituen herriko auzoetan urrian, okupazioak azken hilabeteetan bizi izan duen kriminalizazioa salatu eta horren atzean dagoena etxebizitza lortzeko zailtasuna dela argudiatzeko:
#Laudio #KapitalismoaBirusaDa pic.twitter.com/bpOSHJqCnx
— Orbeko Etxea (@orbekaos) October 9, 2020
Larunbateko elkarretaratzea, aldiz, Santurtziko Okupazio Mugimenduari babesa adierazteko egingo dute. Bizkaiko herri horretan manifestazioa egingo dute egun berean, lema berarekin. Bilbon ere antzeko ekimena gauzatuko dute, Eliptika plazan.
Gune okupatuen aldeko aldarria zabaltzea izango da ekimenen xedea. “Okupatutako espazioak beti izan ziren borroka politikoen babesleku, non elkartasun-harremanak eta elkarri laguntzeko harremanak sortu ziren, indarkeriarik gabe, bai eta berdinen eta askotarikoen arteko bizikidetza-harreman espazioak ere”, azaldu dute mobilizazioen sustatzaileek Internet bidez zabaldutako irakurketan.
Horrez gain, kaleratze arriskuan dauden espazioei elkartasuna adieraziko diete manifestazio eta elkarretaratzeetan, Txorimalo Gaztetxeari kasu.