Hautsak harrotu ditu Arantzarreko kamioien aparkalekuko tasa igoerak. Garraiolariek salatu dute hemendik aurrera bikoitza baino gehiago ordaindu beharko dutela, hileko 68, 36 euro ordaintzetik 145 euro ordaintzera igaro delako tasa. “Laudiokoak garenok hobaria dugu, baina hobari horrekin ere orain arteko bikoitza ordainduko genuke”, salatu du Jon Gonzalezek.
Aparkalekuko garraiolarien bozeramaileak salatu du udalak ez diela igoeraz abisatu. “Estatutuek diote egiten den aldaketa oro erabiltzaile guztiei azaldu behar zaiela, baina ez digute ezer aipatu, albiste baten bidez izan genuen horren berri”.
Zerbitzuaren gabeziak
Zerbitzuaren gabeziak ere nabarmendu ditu Gonzalezek. “Zinpeko zaintzale bakarra dago, gainontzekoak laguntzaileak dira, eta ez dute espazioa zaintzeko azpiegitura egokirik”, azaldu du, “gainontzeko aparkalekuek gutxiengo zerbitzuak dituzte, dutxa duinak, esertzeko tokiak...”. Segurtasuna kolokan dagoela gehitu du garraiolari laudioarrak: “hesiak kolpeak jaso ditu eta ez dute konpondu, eta guk balio handiko merkantziak daramatzagu. Udal gobernuari esan diegu gurekin asanblada bat egiteko. Egunez ez da zaintzarik behar, hesi egoki bat, txartel bidezko sarbidea eta segurtasun kamerak baldin badaude”.
Horrez gain, Aiarako Kuadrillaren plataforma batzuek espazioa okupatzen dutela gehitu du Gonzalezek.
Udalaren erantzuna
Udalak irailean eman zituen prezioaren igoeraren inguruko azalpena, datorren urterako ordenantza fiskalen proposamena aurkeztu zuenean. Aparkalekuaren kostua erabiltzaileek osorik ordaintzea defendatu zuen udal gobernuak, bestela herritar guztiak izango liratekeelako kostu hori ordaindu beharko luketenak, zergen bidez. Gainera, aparkalekuko erabiltzaile asko herrian erroldatuak ez daudela gaineratu zuen tokiko erakundeak.
Horren aurrean, honakoa erantzun du Gonzalezek: “Beti berdinak gara ordaintzen dugunak, eta ezin da horrela izan”. COVID-19ak garraiolarien sektorea gogor kolpatu duela azaldu du laudioarrak: “Guk ere kolpea jaso dugu, esportazio eta inportazioan aritzen baikara. %40 gutxiago fakturatzen ari gara, eta ez da onaragarria mota honetako igoera bat bapatean jasotzea”.
Ehundik gora erabiltzaile
Une honetan 101 plaza ditu aparkalekuak, eta denak daude okupatuta. “Ferietan aritzen diren pertsonen azpiegiturak ere daude, udan soilik erabiltzen direlako. Aurtengo urtea oso gogorra izan da eurentzat eta horietako batzuk ez dute tasa ordaintzerik izan”.
