Laudioko saltoki txikien 'marketplace-a' aurkeztu du aste honetan APILLek Rural Kutxarekin lankidetzan. Plataforma digital berriak herriko komertzioetako produktuak Internet bidez erosteko aukera eskainiko du.
Sarearen bidezko erosketek gorakada handia bizi izan dute azken hilabeteetan. Gorakada hori saltoki txikientzako “mehatxu bat dela” azaldu dute APILLeko ordezkariek, eta "martxan jarritako tresna berriak" mehatxu hori Laudioko saltokientzako aukera berri bihurtu nahi du.
'Zure merkataritza gara' izena du plataforma digitalak, eta oraingoz Laudioko 20 saltokiren produktuak daude bertan eskuragarri, baina hurrengo asteetan komertzio gehiago batzea aurreikusten dute. Egitasmora batu nahi den saltoki orok APILLekin harremanetan jartzea besterik ez du.
Rural Kutxak eskaini ditu baliabide teknikoak. Plataformak “erabilera erreza eta intuitiboa” duela nabarmendu dute, eta baita ordainketa sistema segurua dela ere. Bezeroak produktuak erosterako orduan komertzioarekin adostuko du hauek nola jaso.