Atzo banatu ziren Gobernantzaren Bikaintasunaren Europako Zigiluak eta Laudiok, Ermua eta Irungo udalekin batera, eskuratu du Europako Kontseiluak banatzen duen saria. Dagoeneko 8 dira zigilua eskuratu duten EAEko udalerriak, eta Laudio da lehenengo udalerri arabarra.
EUDELek Bilbon duen egoitzan ospatu zen sari banaketa. Ander Añibarro alkatea eta Ander Larrinaga funtzio publikoko zinegotzia egon ziren bertan, herriko ordezkari gisa. Izan ere, 2017. urteaz geroztik EUDEL da EAEn zigiluak banatzeko Europako Kontseiluak aukeratutako erakunde eskuduna.
Kalitate zigilua bi urtean behin berritu beharra dago. Gainera EUDELek gobernantza onaren etengabeko ebaluazio prozesuan laguntzeko tresnak jarriko ditu Laudioko Udalaren esku, “etengabeko hobekuntzaren pizgarri izan dadin”.
Europan 100 udalerrik baino ez dute zigilua lortu.“Kalitate eta berrikuntza demokratikoaren” berme diren 12 printzipio-etiko baloratzen ditu sariak:
- Hauteskundeak eta bidezko ordezkaritza nahiz parte-hartzea
- Erantzuteko gaitasuna
- Efizientzia eta efikazia
- Irekia izatea eta gardentasuna
- Zuzenbide-estatua
- Jokabide etikoa
- Eskumenak eta gaitasunak
- Berrikuntza eta aldaketen aurrean irekita egoteko joera
- Jasangarritasuna eta epe luzerako orientazioa
- Finantza-kudeaketa osasuntsua
- Giza eskubideak, kultura-aniztasuna eta gizarte-kohesioa
- Kontuak emateko betebeharra