Noiztik zabiltza Suitzan bizitzen? Zer dela eta joan zinen bertara bizitzera?
Badira 5 urte eta erdi hemen bizi naizela. Laudion bizi nintzen, eta nire lana medio, herrialdea ezagutzen nuen jada.
Gauzak hala, bertan lan egiteko aukera proposatu zidatenean, bizitzera etortzea erabaki nuen.
Oso ezberdina da bertako bizitza Laudiokoarekin alderatuz? Zertan?
Nire kasuan Laudio moduko herri batetan bizi naiz, eta eguneroko bizitza oso antzekoa da. Ezberdintasunak lanetik kanpo egiten diren lagunarteko planetan agertzen dira, batez ere. Plan gehienak kanpoan egiten dira eta naturarekin erlazionaturik daude. Gutxi dira leku itxietan egiten diren jarduerak.
Harritzekoa da Suitzan naturguneak zeinen prestatuak eta zainduak dauden, ingurumenarekiko errespetua oso handia da.
Gabonei begira, zer asmo dituzu? Bertan pasako dituzu edo Laudiora etorriko zara?
Gabonak Laudion pasatzea gustatuko litzaidake. Baina, egoera horren aldakorra izanda, ezin dira bidaiak gehiegi planifikatu.
Zein da zure etorkizuneko aurreikuspena? Suitzan bizitzen jarraitzeko asmoa duzu?
Denboraldi baterako Suitzan jarraitzea da asmoa, baina bizitzak buelta asko ematen ditu, ezin jakin.
Nola eragin du COVID-19aren pandemiak bertan?
Suitzan hartutako neurriak eztabaidagai izan dira hainbat hedabideetan. Ez dute etxeko konfinamendurik ezarri eta eguneroko bizitza ahalik eta normalen mantentzen ahalegindu dira, segurtasun neurriak hartuta, noski.
Nire kasuan familia izan dut beti buruan, oso gertutik jarraitzen dut Laudioko egoera.
Bukatzeko, zeozer gaineratu nahiko zenuke?
Aiaraldear guztiei osasuna opa nahiko nieke, gabon zoriontsuak pasa eta urte berri on! Joyeux Noël et Bonne Année!