Laudioko berbak, palabras de Llodio izenburupean gaur aurkeztu dute Laudioko Udalak abiatutako ondare bildumaren lehen alea. Felix Mugurutza Montalbanek zuzendu du egitasmoa, eta "udalerriaren ondare-nortasuna osatzen duen herri-kulturako adierazpen guztiak bildu eta ezagutaraztea" da asmoa. Elebitan dago hitz edo esamoldeari dagokion azalpen oro, eta guztira 300 hitz baino gehiago pilatu dituzte argitalpenean. Laudioko etxebizitza edo familia unitate bakoitzarentzat ale bana gordeko dute, udaletxean egongo dena eskura bihartik aurrera. Sarean ere zintzilikatuko dute liburua, baina 2021eko Dolumin Barikuan (Aste Santuaren aurreko ostiralean, alegia).
"Lan xumea"
Herritarren eta Udalaren laguntzaren uzta da liburua, ikerketa lan zabala baitu atzean. Hala adierazi du Joseba Amondo alkateordeak, "Laudioko liburutegiaren lehen lana izan daitekeena da". Izan ere, urtero herri ondarearen atal bat plazaratzeko asmoa dute. Aurreratu dutenez, 2021eko erronka tokiko kondaira, ohiturak eta kontakizunak pilatzea izango da. "Hau ez da lanaren amaiera, hasiera baizik", azpimarratu dute, "jakintza biltzea da helburua".
2021eko erronka Laudioko kondaira, ohiturak eta kontakizunak pilatzea izango da
Felix Mugurutza Montalbanen hitzetan, transmisiorako bilketa funtsezkoa da, "arbasoek jakintza asko utzi digute, eta galtzen ari gara. 20 urte barru, ziurrenik, ez dira hitz hauek erabiliko". Lekukotzen bidez aletu dute egitasmoa, herritarren parte hartzearekin. "Hitz batzuk orokorrak dira, baina 300 hitz horien ADNa Laudiokoa da, esanahiagatik. Lan xumea da, genekiena batu dugu".
Tokiko hitzen artean Arraño edota Kutxa aipatu ditu idazleak. "Arraño toponimoa bihurtu da, baina zuhaitzik gabeko larrei esaten zaie, behientzat erabiltzen ziren. Larrarekin konfundituta, Larraño sortu zen". Kutxa, aldiz, mamiari esan izan zaio Gorbeia inguruan, eta Koipetsu urdai erreari.
Azalean garai bateko laudioarren argazkia jarri dute: "Liburu denetan pertsonak jarri nahi ditugu azalean, eurek baitira ondarearen protagonistak". Zehazki, 1915. urteko irudia da, Malkuartuko bizilagunena.
2021ean izango du jarraipena egitasmoak, aurrez esan bezala. "Mitotatik historiara" jauzi egiteko nahia aipatu du Mugurutzak zentzu horretan. "Oxala etorkizunean norbaitek lan hau segitu eta hobetzea", erantsi du.
