Azken urtean jazotako gertaeren kronika egin dute Gazte Asanbladako kideek elkarretaratzearen osteko hitzartzean. "Gune autogestionatuen eta militantzia politikoaren aurkako ofentsiba" gauzatzea leporatu diote Laudioko Udalari. Gaztetxeko kideen ustez, tokiko erakundeak ez du duela urtebete eman zuen hitza bete, Kultur Etxeko lehen faseko obrak amaitu diren arren, Gaztetxea itxita mantentzea erabaki duelako, beste espazio batzuk ireki egingo dituzten bitartean. "Ezer gutxi zehazten duen informe batean oinarrituta, Kultur Etxeko hainbat espazio itxi ditu, segurtasun eza argudiatuta. Baina gu ez gaude ados eta erabaki horren arbietraritatea salatu nahi dugu".
Udaltzainen jarrera ere salatu dute, desalojoa gauzatu zenean Gaztetxean zeuden kideak isuntzeko zorian egon zirelako, eta arratsaldean kartelak jartzen ari ziren beste kide batzuk identifikatu zituztelako. Horrelako kasuak azken hilabeteetan ohikoak bilakatu direla nabarmendu dute, gainera. "Prozesu hau hasi besterik ez da egin. Ez ditugu udalaren jarrera arbitrario eta autoritarioak onartuko, ezta militantzia politikoaren aurkako erasoak ere".
Okupazioaren aurkako ofentsiba bat gertatzen ari dela nabarmendu dute gazteek, eta horren aurka borrokatzeko deia luzatu dute. Gauzak hala, Erraki sareak deitutako mobilizazioetara gerturatzeko gonbita luzatuz amaitu dute ekitaldia.